დღეს, იუსტიციის სამინისტროს საჯარო რეესტრის ეროვნული სააგენტოს თავმჯდომარემ სოსო წიქარიშვილმა და პრივატბანკის დირექტორმა ალექსანდრე ჩოჩიამ ბიზნესის დაწყების მსურველებისთვის ახალი სერვისის პრეზენტაცია გამართეს.
იუსტიციის სამინისტროს საჯარო რეესტრის ეროვნული სააგენტო და პრივატბანკი კიდევ ერთ ახალ სერვისს სთავაზობს ბიზნესის დაწყების მსურველებს.
დღეიდან, საჯარო რეესტრში ინდმეწარმის ან შპს-ს დარეგისტრირების, მეწარმის სახელზე, პრივატბანკში ავტომატურად გაიხსნება მისი საბანკო ანგარიში. მეწარმე სუბიექტს ორგანიზაციის ფინანსური ოპერაციების განხორციელება ამ ანგარიშით შეეძლება. აღნიშნულ მომსახურებას მათ საჯარო რეესტრის მიმღები ოპერატორები გაუწევენ. მომხმარებელს აღარ დასჭირდება ბანკში ვიზიტი საბანკო ანგარიშის გასახსნელად. ანგარიშის ნომერს მეწარმე მის მიერ განცხადებაში მითითებულ მობილურზე მოკლე ტექსტური შეტყობინებით მიიღებს. პრივატბანკში ანგარიშის გახსნა უფასო და ნებაყოფლობითი პროცესია.
საჯარო რეესტრისა და პრივატბანკის ერთობლივი პროექტი სახელმწიფო ორგანიზაციის და კერძო საფინანსო ინსტიტუტის წარმატებული ურთიერთთანამშრომლობის კიდევ ერთი მაგალითია.
ამ ეტაპზე, საჯარო რეესტრი საბანკო ანგარიშის გახსნას მსურველებს მხოლოდ პრივატ ბანკში სთავაზობს. საჯარო რეესტრი მოლაპარაკებას სხვა საბანკო დაწესებულებებთანაც აწარმოებს. უახლოეს მომავალში დაინტერესებულ პირებს, ბიზნესის რეგისტრაციისთანავე, ნებისმიერ ბანკში ავტომატურად შეეძლებათ საბანკო ანგარიშის გახსნა.