იტალიის პრემიერ-მინისტრი ჯორჯია მელონი გამოვიდა ინიციატივით ნატოს მე-5 მუხლი უკრაინაზე ქვეყნის სამხედრო ალიანსში გაწევრიანების გარეშე გავრცელდეს. იგი მიიჩნევს, რომ ეს უზრუნველყოფს უკრაინის გრძელვადიან და ეფექტურ უსაფრთხოებას. იუწყება Financial Times
მელონის თქმით, უკრაინის ნატო-ს კოლექტიური უსაფრთხოების გარანტიების მიწოდება ფორმალური წევრობის გარეშე უფრო ეფექტური იქნება, ვიდრე სხვა ვარიანტები, კერძოდ, სამშვიდობო ძალების შეყვანა ცეცხლის შეწყვეტის მონიტორინგისთვის.
„უკრაინაზე იგივე დაცვის გავრცელება, რაც ნატო-ს ქვეყნებს აქვთ, რა თქმა უნდა, ბევრად უფრო ეფექტური იქნება, თუმცა ეს იქნება რაღაც განსხვავებული ნატო-ს წევრობისგან. ვფიქრობ, ეს იქნება უსაფრთხოების სტაბილური, გრძელვადიანი, ეფექტური გარანტია, ბევრად უკეთესი ვიდრე ზოგიერთი წინადადება, რომელსაც მე ვხედავ“, - აღნიშნა მელონიმ.
კითხვაზე, რა განსხვავებაა მელონის წინადადებასა და უკრაინის ნატო-ში სრულ გაწევრიანებას შორის, იტალიის მთავრობის პრესსპიკერმა თქვა, რომ ეს ნაბიჯი უზრუნველყოფს ორმხრივი თავდაცვის პუნქტის გამოყენებას "ასევე უკრაინის დასაცავად... ნატო-ს მიღმა ტერიტორიაზეც კი, მიუხედავად კიევის წევრობისა".
„განუსაზღვრელი სამხედრო კონტიგენტების გაგზავნა, ბრიტანული თუ სხვა, ყველაზე რთული და შესაძლოა ნაკლებად ეფექტური გამოსავალია. მე ვსაუბრობდი ამაზე, ვიმეორებდი და ასევე გამოვრიცხავდი იტალიელი სამხედროების გაგზავნას ამ კონტექსტში“, - განაცხადა მელონიმ.
