დიდი ბრიტანეთის პრემიერ-მინისტრი კირ სტარმერი თეთრ სახლში გამართული აშშ-ს პრეზიდენტ დონალდ ტრამპისა და უკრაინის პრეზიდენტ ვოლოდიმირ ზელენსკის შეხვედრის შემდეგ, დონალდ ტრამპს და ვოლოდიმირ ზელენსკის ტელეფონით ესაუბრა.
კირ სტარმერი მტკიცედ უჭერს მხარს უკრაინას თეთრი სახლის დაპირისპირების ფონზე. ამის შესახებ Reuters ბრიტანეთის პემიერის ადმინისტრაციაზე დაყრდნობით იუწყება.
გაერთიანებული სამეფოს პრემიერის ადმინისტრაციის ცნობით, კირ სტარმერის „მხარდაჭერა უკრაინის მიმართ ურყევია და ყველაფერს აკეთებს, რათა უკრაინის სუვერენიტეტისა და უსაფრთხოებაზე დაფუძნებული მდგარი მშვიდობისკენ მიმავალი გზა იპოვოს“, -ნათქვამია განცხადებაში.
ასევე განცხადების თანახმად, კირ სტარმერი მოუთმენლად ელის „კვირას უმასპინძლოს საერთაშორისო ლიდერებს, მათ შორის პრეზიდენტ ზელენსკის“.
26 თებერვალს გამართულ პრესკონფერენციაზე ზელენსკიმ განაცხადა, რომ აშშ-ში ვიზიტის შემდეგ ლონდონს ეწვევა, სადაც ევროპელი ლიდერები შეიკრიბებიან, რათა განიხილონ ერთობლივი გეგმები თავდაცვისა და უსაფრთხოების სფეროებში.
