ევროკავშირის უმაღლესმა წარმომადგენელმა, კაია კალასმა ვაშინგტონში ვიზიტის დროს AFP-თან ინტერვიუში აღნიშნა, რომ ევროპელები ვერ შეძლებენ, დაეხმარონ ცეცხლის შეწყვეტის შეთანხმებაში, თუ დონალდ ტრამპი მათ მოლაპარაკებაში არ ჩართავს.
მისი თქმით, ნატო-ს ქვეყნები არასოდეს დასხმიან თავს რუსეთს, რომელსაც „დემოკრატიის ეშინია“.
„რატომ ვართ ნატო-ში? ეს იმიტომ ხდება, რომ რუსეთის გვეშინია. ერთადერთი, რაც ნამდვილად მუშაობს, უსაფრთხოების ერთადერთი გარანტია ნატო-ს ქოლგაა“, – განაცხადა კაია კალასმა.
გამოცემა აღნიშნავს, რომ სამი წლის წინ რუსეთმა თავისი შეჭრის მიზეზად უკრაინის ნატო-ში შესაძლო გაწევრიანება დაასახელა. მას შემდეგ პუტინი ეჭვქვეშ აყენებს უკრაინის, როგორც რუსეთისგან განცალკევებული ქვეყნის ისტორიულ ლეგიტიმურობას.
ტრამპმა, რომელმაც პუტინის იზოლაცია ამ თვის დასაწყისში სატელეფონო ზარით დაარღვია, ოთხშაბათს თქვა, რომ უკრაინას შეუძლია „დაივიწყოს“ ნატო-ში გაწევრიანება და თქვა „ვფიქრობ, ალბათ ამიტომ დაიწყო ეს ყველაფერი“.
„ეს ბრალდებები აბსოლუტურად არ შეესაბამება სიმართლეს. ეს არის რუსული რიტორიკა, რომელიც არ უნდა დავიჯეროთ“, - თქვა კალასმა ტრამპის კომენტარების შესახებ დასმულ შეკითხვაზე.
კაია კალასმა აღნიშნა, რომ უკრაინის შესახებ ნებისმიერ გარიგებაში „ევროპელები უნდა იყვნენ ბორტზე“.
კაია კალასის განაცხადებით, ნატო უკრაინას უსაფრთხოების საუკეთესო გარანტიას სთავაზობს.
„რატომ უნდა მივცეთ რუსეთს ის, რაც სურს, გარდა იმისა, რაც უკვე გააკეთეს – უკრაინაზე თავდასხმა, ტერიტორიის ანექსია, ტერიტორიის ოკუპაცია და ახლა ამ ყველაფერთან ერთად, რაღაცის შეთავაზება? დაფიქრდით, აქ, ამერიკაში, 11 სექტემბრის შემდეგ თქვენ დასხდებოდით ბინ ლადენთან და ეტყოდით: „კარგი, კიდევ რას ისურვებდი?“ იმას ვგულისხმობ, რომ ეს წარმოუდგენელია“, – განაცხადა კაია კალასმა.
