აჭარაში კიდევ ერთი სამთო-სათხილამურო კურორტის მშენებლობა იწყება. ხულოს რაიონის სოფელ დანისპარაულში დღეს კიდევ ერთი სპორტული კომპლექსი გაიხსნა. ეს ზამთრის მესამე კურორტი იქნება აჭარაში. ამ ეტაპზე დანისპარაულის სპორტულ კომპლექსში 100-მდე ბავშვს 3 ინსტრუქტორი ავარჯიშებს. დღეს მათ საქართველოს პრეზიდენტი მიხეილ სააკაშვილი აჭარის მთავრობის თავჯდომარე ლევან ვარშალომიძესთან ერთად შეხვდა.
"პირველ დეკემბერს აქ იქნება კარგი სათხილამურო კურორტი. 1-ელ დეკემბერს მზად უნდა იყოს 5-კილომეტრიანი საბაგირო სათხილამურო ტრასა, რომელიც ბაკურიანსა და გუდაურის სათხილამურო ტრასებზე გაცილებით გრძელი იქნება. 1-ელ დეკემბრამდე კურორტი უნდა იყოს ისე მოწყობილი, რომ საქართველოში არავის ენახოს ესეთი რამ", - განაცხადა სააკაშვილმა.
პარალელურად, მილენიუმის პროგრამის ფარლებში, ხულო-ადიგენის გზის რეაბილიტაცია მოხდება.
სააკაშვილის თქმით, ზამთრის კურორტი რომ განვითარდება, ეს აუცილებლად აისახება კურორტზე მცხოვრები ადამიანების ეკონომიკურ მდგომარეობაზე.
პრეზიდენტის თქმით, სათხილამურო სპორტი მასობრივი უნდა გახდეს. რისთვისაც სკოლებში შესაბამისი ინვენტარი უფასოდ დარიგდება. აჭარაში წლის ბოლომდე თხილამურების ექსპერიმენტული საწარმოს გახსნაც იგეგმება.
დანისპარაულში საქართველოში ყველაზე გრძელი სათხილამურო ტრასა და საბაგირო
ხაზები მოეწყობა. აშენდება დასასვენებელი კოტეჯებიც.