"სოკარი ჯორჯია გაზმა" დაასრულა გაზსადენის ფოთის მონაკვეთის მშენებლობა, რომლის პრეზენტაციაც დღეს 24 იანვარს გამართება.
პრეზენტაციას საქართველოს ენერგეტიკის მინისტრი ალექსანდრე ხეთაგური, "სოკარის" გენერალური დირექტორი როვნაგ აბდულაევი, "სოკარ ჯორჯიას" ხელმძღვანელი მაილ მამედოვი დაესწრებიან.
პრეზენტაციას, შესაძლოა, საქართველოს პრეზიდენტიც დაესწროს.
კომპანიის ცნობით, 6,8-კილომეტრიანი გაზსადენი 9 საცხოვრებელ კორპუსს და კერძო სექტორს მოიცავს, რაც მთლიანობაში 707 პოტენციური აბონენტის ქსელში ჩართვის შესაძლებლობას იძლევა.
"ეს საკითხი განსაკუთრებით მნიშვნელოვანია როგორც ფოთისთვის, ასევე მთელი ქვეყნისთვის, რადგან ფოთს ბუნებრივი გაზის მიღების შესაძლებლობა დღემდე არ ჰქონდა, შესაბამისად, "სოკარ ჯორჯია გაზს" შესაბამისი სამუშაოების დაწყება ნულიდან უწევს. ფოთის გაზიფიკაცია სოციალურ-ეკონომიკური მდგონმარეობის გაუმჯობესების თვალსაზრისით უაღრესად მნიშვნელოვანია, მით უმეტეს, რომ ქვეყნის ამ რეგიონში თავისუფალი ეკონომიკური ზონა მდებარეობს," - განმარტავენ კომპანიაში.
"სოკარ ჯორჯია გაზი" აღნიშნული გაზსადენის მშენებლობისას უახლეს ევროპულ ტექნოლოგიას იყენებს. პოლიეთილენის გაზსადენის ექსპლუატაციის ვადა უფრო ხანგრძლივია.
კომპანია ფოთში 150-კილომეტრიანი გაზსადენის მშენებლობას გეგმავს, მთლიანად გაზიფიცირების შედეგად 17 ათასი აბონენტი და 174 სხვადასხვა ტიპის ობიექტი მიიღებს ბუნებრივ გაზს.
3-წლიანი საინვესტიციო პროგრამის ფარგლებში (2009-2011 წლები) სამეგრელოს რეგიონში 500-კილომეტრიანი ახალი გაზსადენის მშენებლობა იგეგმება, რაც 40 ათასი აბონენტის მიერთებას გულისხმობს. მთელ საქართველოში 1500-კილომეტრიანი გაზსადენი აშენდება და შედეგად 150 ათასი აბონენტი იქნება გაზიფიცირებული.
2009-2010 წლებში კომპანიამ "სოკარ ჯორჯია გაზი" 880 კილომეტრი გაზსადენი ააშენა და შედეგად 86 ათასი აბონენტის გაზით მომარაგებაა შესაძლებელი.
კომპანია "სოკარ ჯორჯია გაზი" "სოკარ ენერჯი ჯორჯიას" შვილობილი კომპანიაა. კომპანიის ძირითადი დანიშნულება ბუნებრივი გაზით მომარაგებაა. კომპანია ახორციელებს გაზის იმპორტს და ახდენს მის სოციალური და კომერციული მომხმარებლისთვის მიწოდებას. ეკონომიკური განვითარების სამინისტროსა და "სოკარ ჯორჯია გაზს" შორის მიღწეული შეთანმხებით, კომპანია ახორციელებს ახალი გაზსადენების მშენებლობასა და რეაბილიტაციას საქართველოს რეგიონებში. ქვეყანაში გაზიფიკაციის მოგვარების მიზნით, საქართველოში კომპანიამ გაზის სადისტრიბუციო 30 კომპანია შეიძინა, რომლებიც სტაბილურად იღებენ გაზს აზერბაიჯანიდან.