14 თებერვლის ღამით რუსულმა დრონმა ჩერნობილის განადგურებული ატომური ელექტროსადგურის დამცავი სარკოფაგი დააზიანა. ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.
მისივე თქმით, სადგურზე ამჟამად მონიტორინგი მიმდინარეობს და რადიაციის დონე ნორმის ფარგლებშია.
"გასულ ღამეს ფუგასური ქობინის მქონე რუსულმა სამხედრო დრონმა დაარტყა საფარს, რომელიც მსოფლიოს ჩერნობილის ატომური ელექტროსადგურის განადგურებული მე-4 ენერგობლოკის რადიაციისგან იცავს.
ეს საფარი უკრაინამ ააშენა ევროპისა და მსოფლიოს სხვა ქვეყნებთან, ამერიკასთან ერთად, მათთან ერთად, ვისაც ხალხის რეალური უსაფრთხოება სურს.
მსოფლიოში ერთადერთი სახელმწიფო, რომელსაც შეუძლია ასეთ ობიექტებზე თავდასხმა, ატომური ელექტროსადგურების ტერიტორიის ოკუპაცია და საომარი მოქმედებების ჩატარება ყოველგვარი შედეგების გათვალისწინების გარეშე, დღევანდელი რუსეთია. და ეს არის ტერორისტული საფრთხე მთელი მსოფლიოსთვის“, - განაცხადა ზელენსკიმ.
უკრაინის პრეზიდენტის თქმით, რუსეთის ქმედებები მიუთითებს იმაზე, რომ ის არა მოლაპარაკებებისთვის, არამედ მსოფლიოს მოტყუებისთვის ემზადება.
"ყოველ ღამით, რუსეთს უკრაინის ინფრასტრუქტურასა და ქალაქებზე ასეთი იერიშები მიაქვს. რუსეთი განაგრძობს თავისი არმიის ზრდას და მისი შეშლილი, ანტიადამიანური სახელმწიფო რიტორიკის ცვლილების არანაირ ნიშანს არ ავლენს. ეს ნიშნავს, რომ პუტინი მოლაპარაკებებისთვის ნამდვილად არ ემზადება - ის მსოფლიოს მოტყუების გაგრძელებისთვის ემზადება". - დაწერა ზელენსკიმ.
უკრაინის საგანგებო სიტუაციების სახელმწიფო სამსახურმა ასევე გაავრცელა ცნობა, რომ ჩერნობილის ატომური ელექტროსადგურის დამცავ სარკოფაგზე რუსული დრონის იერიშის შემდეგ რადიაციის დონე ნორმის ფარგლებს არ გასცდენია. სამსახურის ცნობით, მონიტორინგი მიმდინარეობს და სიტუაცია კონტროლს ექვემდებარება.
ამასთან, ატომური ენერგიის საერთაშორისო სააგენტო ადასტურებს, რომ ჩერნობილის ატომური ელექტროსადგურის დამცავი სტრუქტურასთან აფეთქება მოხდა, რამაც ხანძარი გამოიწვია.
