ეკონომიკური თვალსაზრისით საქართველოს სომხეთთან მიმართებაში დიდი ინტერესი აქვს, _ ამის შესახებ განცხადება საგარეო საქმეთა მინისტრის მოადგილემ ნინო კალანდაძემ ორშაბათის ტრადიციულ ბრიფინგზე გააკეთა.
კალანდაძე ამბობს, რომ საქართველოს სომხეთთან გახსნილი საზღვრები აქვს, თუმცა, ამ მიმართულებით ინტერესი კიდევ არსებობს, რაზეც მხარეები სავარაუდოდ მომავალში ისაუბრებენ.
"ჩვენ სომხეთთან გახსნილი საზღვრები გვაქვს, სრულად გამარტივებულია მიმოსვლა ორი ქვეყნის ინტერესებიდან გამომდინარე. თუმცა კიდევ მეტი ინტერესი გვაქვს იმაში, რომ ეკონომიკური და სავაჭრო ბრუნვა გაიზარდოს და ჩვენ მოქალაქეებს ერთმანეთის მიმართ მეტი დაინტერესება გააჩნდეს. თუ ამის რაიმე ტექნიკური გამარტივების მექანიზმები არსებობს, ალბათ მხარეები ამაზე იმსჯელებენ, თუმცა ამ ეტაპზე მიმოსვლისათვის ტექნიკური ბარიერები ორ ქვეყანას შორის არ არსებობს",- აცხადებს კალანდაძე.
კალანდაძე ხაზს უსვამს იმასაც, რომ ლარსის გახსნისათვის საქართველომ რუსეთთან მოლაპარაკებები თავად აწარმოა, რაშიც სომხური მხარის ინტერესიც იყო.
"პირიქით, საქართველომ რუსეთთანაც კი აწარმოა მოლაპარაკებები, რათა ლარსის საზღვარი გახსნილიყო, უპირველეს ყოვლისა, სომხეთის მოქალაქეების ინტერესების გამო და თუკი დამატებითი ხელშეწყობა შეგვიძლია, ამაზე ვიმსჯელეთ და პრეზიდენტების შეხვედრაზე სომხურმა მხარემ კიდევ რამდენიმე წინადადება წამოჭრა, რომელსაც ჩვენ აუცილებლად გავითვალისწინებთ",- აღნიშნა ნინ კალანდაძემ.
შეგახსენებთ, რომ მიხეილ სააკაშვილი ორდღიანი ვიზიტით იმყოფებოდა სომხეთში, სადაც სომხეთის პრეზიდენტთან მოლაპარაკებები გამართა.