ევროკავშირ-საქართველოს თანამშრომლობის ფარგლებში ხელი მოეწერა 2010 წლის სამოქმედო გეგმით გათვალისწინებულ ორ საფინანსო შეთანხმებას, რომლის მიხედვითაც საქართველო 18,2 მლნ. ევროს დახმარება მიიღებს.
დოკუმენტს ევროკავშირის სახელით ხელი მოაწერა ევროკომისიის განვითარებისა და თანამშრომლობის დირექტორატის ხელმძღვანელმა მარკუს კორნარომ, ხოლო საქართველოს მთავრობის სახელით დოკუმენტს ხელი ვიცე-პრემიერმა გიორგი ბარამიძემ მოაწერა.
პირველი საფინანსო შეთანხმების - "დახმარება სახელმწიფო ფინანსების მართვის რეფორმის მხარდასაჭერად" ფარგლებში გათვალისწინებულია 11 მილიონი ევროს გამოყოფა, საიდანაც 10 მილიონი ევრო პირდაპირ მიმართული იქნება სახელმწიფო ბიუჯეტში. ხოლო 1 მილიონი ევრო მოხმარდება საბიუჯეტო დახმარების ფარგლებში შესაბამისი ტექნიკური დახმარების პროექტის დაფინანსებას.
ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის გიორგი ბარამიძის განმარტებით, ეს ფაქტი შეიძლება განვიხილოთ როგორც ევროკავშირის მხრიდან საქართველოს პოლიტიკური და ფინანსური სისტემების ეფექტიანობის გამჭვირვალობისა და მდგრადობის კიდევ ერთი აღიარება. აღნიშნული დახმარება წარმოადგენს ანალოგიური პროგრამის მეორე ეტაპს, რომლის ფაგლებშიც 2007 წელს საქართველომ 16 მილიონი ევროს საბიუჯეტო დახმარება მიიღო, რომელიც მომდევნო 3 წლის განმავლობაში იქნა ათვისებული.
მეორე საფინანსო შეთანხმების - "საჯარო მომსახურეობის დაძმობილების პროგრამა "ტვინინგი" და ტექნიკური დახმარება სამეზობლო პოლიტიკის სამოქმედო გეგმის ინპლემენტაციის მხარდასაჭერად" ფარგლებში განისაზღვრა 7,2 მილიონი ევროს დახმარება, რომელიც მოხმარდება საქართველოს სახელმწიფო უწყებების ინსტიტუციურ განვითარებას ევროპული სტანდარტების შესაბამისად ევროკავშირის წევრი ქვეყნების შესაბამის სტრუქტურებთან თანამშრომლობისა და დაძმობილების გზით.
დღეისათვის პროგრამა "ტვინინგი" ფარგლებში საქართველოს განათლების სამინისტროსა დ ასაქართველოს ეროვნულ მუზეუმში ორი პროექტი მიმდინარეობს. გაერთიანებული სატრანსპორტო ადმინისტრაციის სამოქალაქო ავიაციის დეპარტამენტში. პროექტის განხორციელება 2011 წლის იანვრის ბოლომდე დაიწყება. ხოლო დამატებით 6 პროექტი 2011 წლის ბოლომე ამოქმედდება და სხვადასხვა სახელმწიფო უწყებებს მოიცავს. აგრეთვე კიდევ 13 პროექტი მომზადების სხვადასხვა ეტაპზეა.