წლის ბათუმის ბიუჯეტის საოპერაციო სალდო გაუარესდა, ამის შესახებ "ეკონომიკური პრობლემების კვლევის ცენტრში" განმარტავენ. ცენტრის მიერ მომზადებული კვლევის მიხედვით ირკვევა, რომ 2010 წელს დამტკიცებულ ბიუჯეტთან შედარებით შემოსავლების პროგნოზი 32,025.5 ათასი ლარით (24,8%) გაიზარდა, რაც სპეციალური ტრანსფერის მოცულობის ზრდითაა გამოწვეული.
"ეკონომიკური პრობლემების კვლევის ცენტრში" აცხადებენ, რომ დამტკიცებულ ბიუჯეტთან შედარებით მნიშვნელოვნად გაიზარდა ხარჯების მოცულობა - 46,739.00 ათასი ლარი (58%), ხოლო ძირითადი ზრდა საბინაო-კომუნალურ მეურნეობასა და საერთო სახელმწიფო მომსახურებაზე მოდის, რამაც მნიშვნელოვნად გაუარესდა საოპერაციო სალდო, რაც არ არის დადებითი ფაქტი.
"განხორციელებული ცვლილებების შედეგად არაფინანსური აქტივების ზრდისთვის განსაზღვრული დაფინანსება შემცირდა -4,134.50 ათასი ლარით, რაც აგრეთვე უარყოფითი ფაქტია.
განხორციელებული ცვლილებების შედეგად 3,059.00 ათასი ლარით გაიზარდა ბიუჯეტის დეფიციტი, რომლის დაფინანსება ფინანსური აქტივების კლებით ხორციელდება"- აცხადებს "ეკონომიკური პრობლემების კვლევის ცენტრის" ექსპერტი შოთა მურღულია.
მისივე ინფორმაციით, შემოსავლების უმეტეს ნაწილს (87%) გრანტები წარმოადგენს. ამ თანხის უმეტესი ნაწილი სახელმწიფო ბიუჯეტიდან გამოყოფილი სახსრებია. გამოთანაბრებითი ტრანსფერი _ 14,177.7 ათასი ლარი; სპეციალური ტრანსფერი _ 119,520.5 ათასი ლარი
სპეციალური ტრანსფერის 95,6 პროცენტი სახელმწიფო ბიუჯეტიდან გამოიყოფა, ხოლო 4,4 პროცენტი აჭარის ავტონომიური რესპუბლიკის ბიუჯეტიდან.
ბათუმის ბიუჯეტის დაახლოებით 70 პროცენტი არასაკუთარი შემოსავალია.
ბათუმის ბიუჯეტის სახელმწიფო ბიუჯეტზე დამოკიდებულების ხარისხი ძალიან მაღალია.
ცენტრში აცხადებენ, რომ 2010 წელს მნიშვნელოვნად გაიზარდა კომუნალური მეურნეობის განვითარებისა და წყალმომარაგების დაფინანსება.
"ამ სფეროში ყველაზე დიდი დაფინანსების მქონე პროექტი "ბათუმის ისტორიული უბნებისა და ტურისტული ინფრასტრუქტურის რეაბილიტაციის" პროგრამაა"- აცხადებს მურღულია.