ჩინეთის ლიდერი სი ძინპინი მოსკოვში "დიდ სამამულო ომში გამარჯვების 80 წლისთავის აღსანიშნავად" 9 მაისის აღლუმს დაესწრება. ამის შესახებ ჩინეთში რუსეთის ელჩმა, იგორ მორგულოვმა განაცხადა.
მისი თქმით, ძინპინმა მიიღო პუტინის მიწვევა და თავის მხრივ მიიწვია რუსეთის პრეზიდენტი ჩინეთში იაპონიაზე გამარჯვებისა 80 წლისთვისა და მეორე მსოფლიო ომის დასრულებისადმი მიძღვნილ ღონისძიებებზე დასასწრებად.
ოფიციალური კომენტარი პეკინს სი ძინპინის აღლუმზე დასწრებასთან დაკავშირებით არ გაუკეთებია. სი ძინპინი ბოლოს მოსკოვში 2023 წლის მარტში იმყოფებოდა. 2015 წელს ის დაესწრო მოსკოვში 9 მაისის აღლუმს.
იანვარში იაპონური მედია იტყობინებოდა, რომ მოსკოვში გამარჯვების აღლუმში მონაწილეობას მიიღებდნენ ჩრდილეოთ კორეის სამხედრო მოსამსახურეები.
15 იანვარს რუსეთის თავდაცვის მინისტრმა ანდრეი ბელუსვომა განაცხადა, რომ 9 მაისთან დაკავშირებით რუსეთში დიდი სამზადისია. მისი თქმით, აღლუმები ჩატარდება მოსკოვში, 8 გმირების ქალაქსა და კიდევ 19 ქალაქში, სადაც სამხედრო ნაწილებია განთავსებული.
ბელუსოვის თქმით, ღონისძიებებზე მოწვეულია 19 „მეგობრული“ ქვეყნის სამხედროები, მათგან 10-მა დაადასტურა მონაწილეობა, მათ შორის 7 ყოფილი სსრკ-ს რესპუბლიკაა.
ონლაინ გამოცემა Meduza-ს ცნობით, აღლუმზე დასწრებას გეგმავენ სლოვაკეთის პრემიერ მინისტრი რობერტ ფიცო, სერბეთის პრეზიდენტი ალექსანდრ ვუჩიჩი, პალესტინის ადმინისტრაციის პრეზიდენტი მაჰმუდ აბასი და ბრაზილიის პრეზიდენტი ლუის ინასიო ლულა და სილვა.
2022 წელს, უკრაინაში რუსეთის სრულმასშტაბიანი სამხედრო შეჭრის ფონზე, ბევრმა მსოფლიო ლიდერმა უარი თქვა მოსკოვში გამარჯვების აღლუმში მონაწილეობაზე.
