"ვერ გავიზიარებ მოსაზრებას, რომ ბენზინსა და პირველადი მოხმარების პროდუქტებზე ფასების მატება ობიექტური მიზეზების გამო ხდება. ჩვენ გვახსოვს, რომ 2008 წელს, მსოფლიოში, ერთი ბარელი ნავთობის ფასი 140 დოლარი იყო, თუმცა მაშინ, საქართველოში "სუპერის" ხარისხის ბენზინის საფასური მაქსიმუმ 2 ლარი იყო და ისიც ცოტა ხნით. ახლა კი, 2 ლარს დიდი ხანია გადასცდა "სუპერის" და "პრემიუმის" მარკის საწვავის ღირებულება და მიუახლოვდა რეგულარის ფასიც", - განუცხადა ცისკარიშვილმა "ჯი-ეიჩ-ენს".

აღნიშნულის კონტექსტში, პოლიტოლოგი აცხადებს, რომ მსოფლიო ფაქტორებზე "სწორებით" ხელისუფლება მხოლოდ თავს იმართლებს.

"ნუ იმართლებენ თავს მსოფლიო ბაზარზე საერთო პროცესებით. მსოფლიო ბაზარზე ამა თუ იმ საქონლის ზრდა ხდება 3-5 %-ით, რაც ნიშნავს, რომ ერთი ლარის ღირებულის პური შეიძლება გახდეს ლარი და 3 თეთრი ან ლარი და 5 თეთრი. ჩვენთან კი, ლამის ორჯერ ძვირდება ყველაფერი, იქნება ეს ტრანსპორტით მგზავრობა, წყალმომარაგება, დასუფთავება თუ ა.შ. ასე რომ, ფასების გაზრდაში მხოლოდ ძალიან მცირე წვლილი უკავია საბაზრო ეკონომიკის კანონებს და ამის ძირითადი განმაპირობებელი ფაქტორი ხელისუფლების მადა გახლავთ, რომელიც მუდმივად მზარდია, განურჩევლად იმისა, თუ რა პროცესები მიმდინარეობს მსოფლიო ბაზარზე", - განმარტავს პოლიტოლიგი.

ამასთან, სოსო ცისკარიშვილის თქმით, ქვეყანაში მონოპოლისტების პრობლემაც არსებობს, რომლებიც თავად ხელისუფლებამ "გააჩინა, დაამკვიდრა და დაამშვენა".

"აღარავის უკვირს, რატომ არის თბილისში წამლები ორჯერ ძვირი, ვიდრე სტამბულში. მონოპოლისტები ხელისუფლებამ გააჩინა, დაამკვიდრა და დაამშვენა ეკონომიკის პრაქტიკულად ყველა დარგში. ეს გახლავთ ძირითადი მიზეზი იმ მოუთოკავი ფასებისა და ახლა უკვე რეგულაციიდან ამოვარდნილი ინფლაციისა, რისი მოწმეც ვართ. თუკი სადმე ვინმემ რამე უნდა მოუჭიროს, ეს გახლავთ სწორედ ხელისუფლების მადა და დაუოკებელი ლტოლვა ფულების ჯერ დაგროვებისა და შემდეგ მისი ჰაერში გასროლისთვის", - დასძინა სოსო ცისკარიშვილმა.

შეგახსენებთ, რომ საქართველოში ბოლო პერიოდში ბენზინსა და პირველადი მოხმარების პროდუქტებზე ფასები დღითიდღე მატულობს.