ოთხშაბათს პლენარულ სხდომაზე შედგება კენჭისყრა და გამოჩნდება, გაიმარჯვებს ექსტრემისტი ქართული ოპოზიცია და ჩვენს დელეგაციას გაუშვებენ ამ კედლებიდან, თუ ეს არ მოხდება, – ამის შესახებ ჟურნალისტებს საპარლამენტო უმრავლესობის წევრმა, ევროპის საბჭოს საპარლამენტო ასამბლეაში საქართველოს საპარლამენტო დელეგაციის ხელმძღვანელმა, თეა წულუკიანმა განუცხადა.
მისივე თქმით, დღეს ევროსაბჭოს საპარლამენტო ასამბლეის სესიაზე საქართველოს დელეგაციის საკითხი დაინიცირდა, როგორც მოსალოდნელი იყო, რადგან ამისთვის მხოლოდ 30 ხმა იყო საჭირო.
„შემდეგ ეს საკითხი, საკითხი იმის შესახებ, ახალი მოწვევის პარლამენტის წევრები უნდა იყვნენ თუ არა საპარლამენტო ასამბლეაში, შესასწავლად გადაეცა კომიტეტს. კომიტეტის სხდომა გამოცხადდა დახურულად. ყველას გვაცნობეს, რომ ამ სხდომაზე გაჟღერებული პოზიციების გარეთ გატანა აკრძალულია. ამ დახურულ სხდომაზე მე და ქალბატონ ეკა სეფაშვილს გვქონდა გამოსვლის საშუალება. ამავე სხდომაზე მოწვეული ბრძანდებოდა ქართული ექსტრემისტული ოპოზიციის ერთ-ერთი წარმომადგენელი“, – აღნიშნა თეა წულუკიანმა.
მისივე თქმით, გადაწყვეტილება საპარლამენტო ასამბლეის მისაღებია.
„ყოველ შემთხვევაში, მე მინდა, ჩვენი ამომრჩევლების ყურადსაღებად სტრასბურგიდან ვთქვა, რომ მათ შეუძლიათ, ჰქონდეთ ჩვენი იმედი. მესმის, რომ ისინი არიან ჩვენს ქვეყანაში ჩუმი უმრავლესობა და მხოლოდ ხმაურიან უმცირესობას არ უნდა ჰქონდეს თავისი სიტყვის გასავალი. ჩვენ ყველაფერს ვაკეთებთ, რომ ჩვენი ამომრჩეველი, რომლისთვისაც ძვირფასია სამშობლო და მისი სტაბილურობა, ღირსეულად იყოს აქ წარმოდგენილი. დანარჩენი, გადაწყვეტილება, რა თქმა უნდა, საპარლამენტო ასამბლეის მისაღებია. ისინი ბევრად მეტნი არიან, ვიდრე ჩვენ, ამიტომ დაველოდოთ მათ ვერდიქტს“, – განაცხადა თეა წულუკიანმა.
