გერმანიის მმართველმა და წამყვანმა ოპოზიციურმა პარტიებმა დაგმეს საქართველოს ხელისუფლების უარი ევროინტეგრაციის პროცესის გაგრძელებაზე. ინფორმაციას გამოცემა „დოიჩე ველე“ ავრცელებს.
გერმანიის პარტიების მიერ 9 იანვარს გამოქვეყნებულ ერთობლივ განცხადებაში ნათქვამია, რომ პარტია „ქართული ოცნების“ გადაწყვეტილება შეაჩეროს პროცესი ევროკავშირთან გაწევრიანების მოლაპარაკებების დასაწყებად, ეწინააღმდეგება მის საარჩევნო დაპირებებს და წარმოადგენს გადახვევას საქართველოს ყველა წინა მთავრობის პოლიტიკიდან.
დოკუმენტს ხელი აწერენ გერმანიის სოციალ-დემოკრატიული პარტია და კავშირი 90“/“მწვანეები“, რომლებიც არიან მმართველი კოალიციის შემადგენელობაში, თავისუფალი დემოკრატიული პარტია, რომელმაც მთავრობა დატოვა, ასევე უდიდესი ოპოზიციური ძალა - კონსერვატიული ბლოკი, რომელიც ქრისტიან-დემოკრატიული კავშირისა და ქრისტიან-სოციალური კავშირის შემადგენლობაშია.
გერმანელი პოლიტიკოსების აზრით, «ქართული ოცნების’ გადაწყვეტილება ეწინააღმდეგება საქართველოს მოქალაქეების აბსოლუტური უმრავლესობის მისწრაფებებს, რომლებიც ქვეყნის მომავალს ევროკავშირში ხედავენ.
განცხადების ავტორებმა გაიხსენეს, რომ 2022 წლის მარტში საქართველოს განაცხადი ევროკავშირში გაწევრიანებაზე მისი სუვერენული გადაწყვეტილება იყო და 2023 წლის დეკემბერში ქვეყანამ მიიღო კანდიდატის სტატუსი.
„იმის ნაცვლად, რომ გამოეყენებინა ეს ისტორიული შესაძლებლობა და წინ წაეწია გაწევრიანების პროცესი თავისი რეფორმების ვალდებულებების შესრულებით, „ქართულმა ოცნებამ“, სამწუხაროდ აირჩია მზარდი ავტორიტარული და ანტიევროპული კურსი“, - განაცხადეს გერმანულმა პარტიებმა.
