ერთიანობა-ნაციონალური მოძრაობა, ძლიერი საქართველო და კოალიცია ცვლილებისთვის ევროპის საბჭოს საპარლამენტო ასამბლეას ღია წერილით მიმართავენ, სადაც ასამბლეის პრეზიდენტს სთხოვენ, რომ არ ცნოს, ასამბლეაში, "გაყალბებული არჩევნების შედეგად" ჩამოყალიბებული საპარლამენტო დელეგაციის უფლებამოსილება.
"ძვირფასო პრეზიდენტო,
ჩვენ, საქართველოს პოლიტიკური პარტიების წარმომადგენლები, მოგმართავთ თხოვნით, ევროპის საბჭოს საპარლამენტო ასამბლეაში არ დაადასტუროთ საქართველოს დელეგაციის უფლებამოსილება, რადგან 2024 წლის 26 ოქტომბრის საპარლამენტო არჩევნები ჩატარდა სერიოზული დარღვევებით, რაც ეწინააღმდეგებოდა საერთაშორისო სტანდარტებსა და ქართველი ხალხის ნებას.
არჩევნების გაყალბების შედეგად ჩამოყალიბებული "პარლამენტი" და მის მიერ არჩეული "პრეზიდენტი" ლეგიტიმაციას მოკლებულნი არიან. დელეგაციაც, რომელიც "ქართულმა ოცნებამ" ასამბლეაში შეიძლება წარადგინოს, მხოლოდ თვითგამოცხადებული რეჟიმის წარმომადგენლებისგან შედგება.
მნიშვნელოვანია ასევე აღინიშნოს, რომ "ქართული ოცნების" ლიდერები, მათ შორის, ბიძინა ივანიშვილი, საერთაშორისო სანქციების ქვეშ არიან - ისინი პასუხისმგებლები არიან ქვეყნის დემოკრატიული რეგრესისა და ადამიანის უფლებების მასობრივი დარღვევების ორგანიზებაზე. საქართველოში მშვიდობიანი პროტესტების მონაწილეთა მიმართ ხორციელდება რეპრესიები, დაკავებები და ძალადობა, რაც კიდევ უფრო აღრმავებს კრიზისს.
ჩვენი მოთხოვნებია:
1. ყველა პოლიტიკური პატიმრის დაუყოვნებლივ გათავისუფლება;
2. ახალი, თავისუფალი და სამართლიანი არჩევნების ჩატარება.
ევროპის საბჭოს საპარლამენტო ასამბლეის პრინციპული პოზიცია გადამწყვეტია დემოკრატიული ღირებულებების დასაცავად საქართველოში.
პატივისცემით, საქართველოს პოლიტიკური პარტიების წარმომადგენლები", - ნათქვამია წერილში.
