რუსეთი აფხაზეთის საოკუპაციო რეჟიმისთვის ელექტროენერგიის ჰუმანიტარულ მიწოდებას 2025 წლის თებერვლის ბოლომდე გააგრძელებს. ამის შესახებ ოკუპანტი რუსეთის საგარეო საქმეთა სამინისტროს პრესსპიკერმა მარია ზახაროვამ უწყებაში გამართულ ბრიფინგზე განაცხადა.
ხელმძღვანელობს რა ჰუმანიტარული მოსაზრებებით, რუსეთმა აფხაზეთის პრეზიდენტის მოვალეობის შემსრულებლის ოფიციალური მომართვის შემდეგ, მიიღო გადაწყვეტილება აფხაზეთში მიმდინარე წლის 23 დეკემბრიდან 2025 წლის თებერვლის ბოლომდე ელექტროენერგიის სოციალურ მიწოდებასთან დაკავშირებით.
ეს გაკეთდა რესპუბლიკის ენერგეტიკულ ინდუსტრიაში არსებული კრიზისული სიტუაციის გათვალისწინებით, რომელიც პროვოცირებულია, სხვა საკითხებთან ერთად, ადგილობრივი ქსელების გაუარესებით და კრიპტოვალუტის უკონტროლო მაინინგით.
ამავდროულად, აშკარაა, რომ სამოკავშირეო ურთიერთობები ორმხრივ ვალდებულებათა ბალანსს გულისხმობს.
ჩვენ გამოვდივართ იქიდან, რომ სოხუმში ისინი გადადგამენ „თავის წილ ნაბიჯს“ აღნიშნული ორმხრივი დოკუმენტების შესაბამისად, რომელიც შეეხება კანონმდებლობის ჰარმონიზაციას, რუსული ინვესტიციებისთვის აუცილებელი პირობების შექმნას და ა.შ.
ჩვენ ვიცით, რომ აფხაზურ საზოგადოებაში არის ფართო მოთხოვნა მოსკოვთან ალიანსის გაძლიერებაზე.
ვიმედოვნებთ, რომ 2025 წლის 15 თებერვალს დაგეგმილი ვადამდელი საპრეზიდენტო არჩევნების შედეგების შემდეგ აირჩევა ლიდერი, რომელიც გააგრძელებს რუსეთთან მჭიდრო თანამშრომლობას აფხაზეთის პროგრესული განვითარებისა და ორმხრივი ურთიერთობების საკითხებზე“, - განაცხადა ზახაროვამ.
