მეტროსადგურ რუსთაველიდან სამედიცინო სფეროს წარმომადგენლების საპროტესტო მსვლელობა დაიწყო - ექიმები მარშით დედაქალაქის მთავარ გამზირზე გადაინაცვლებენ და საკანონმდებლო ორგანოსთან მიმდინარე აქციას შეუერთდებიან.
"დაინიშნოს ახალი არჩევნები, თავისუფლება რეჟიმის პატიმრებს" - სკანდირებენ მედიკოსები, რომლებმაც აქცია-მსვლელობის დაწყებამდე, რუსთაველის მეტროსთან, პეტიცია შეადგინეს და ხელი მოაწერეს.
მარშზე იმყოფება გუგა კუზანოვის ძმა, ალექსანდრე კუზანოვიც. მისი თქმით, თითოეული ქართველის ბედი ახლა წყდება.
"ჩვენი მომავალი ევროპაა. ამის გარეშე წინსვლა შეუძლებელია. ბავშვების მომავალი დღეს წყდება. უნდა ვიდგეთ და ვიაროთ წინ. უნდა შევებრძოლოთ ბოლომდე. მთლიანად ერი გაერთიანებულია. მშვიდობიანად ვცდილობთ მივაღწიოთ იმ სიმართლეს, რომელიც ჩვენ გვეკუთვნის", - ამბობს ალექსანდრე კუზანოვი "ტვ პირველთან".
ფოტო: პუბლიკა
