ქართულ-ებრაული კომპანია "ტერა 1" აეროპორტის მიმდებარედ, თავისუფალი ეკონომიკური ზონის მოსაწყობად შესაბამის ლიცენზია ამ დრომდე არ მიუღია.
კომპანიაში განმარტავენ, რომ ებრაული კომპანია "ტერა ჯგუფი" სახელმწიფოსთან მოლაპარაკებას და გარკვეული დეტალების შეთანხმებას ამ დროისთვისაც აწარმოებს, თუმცა გარიგების დეტალების შესახებ კომპანიაში არ საუბრობენ.
რამდენიმე თვის უკან "ტერა 1"-ის ლიცენზიის მიუღებლობის მიზეზად 250 ათას ლარიან საბანკო გარანტიას ასახელდება, რომელსაც სახელმწიფო კომპანიისგან ითხოვდა. თუმცა კომპანიის მენეჯმენტი დღეს აცხადებს, რომ საბანკო გარანტიის თემა დღის წესრიგიდან საერთოდ მოხსნილია, რადგანაც ახალი კანონმდებლობით წარსადგენი საბანკო გარანტიის მოცულობა 5-ჯერაა შემცირებული.
2008 წელს "ტერა 1"-მა აეროპორტის მიმდებარედ 45 ჰექტარი მიწა, 30 მლნ. დოლარად, იმ პირობით შეიძინა, რომ 10 ჰექტარზე თავისუფალ ეკონომიკურ ზონას მოაწყობდა, თუმცა მთავარ ინვესტორსა და სახელმწიფოს შორის არსებული გაუგებრობის გამო პროექტი დროებით შეჩერდა.
შეგახსენებთ, რომ მთავრობამ თბილისში თავისუფალი ეკონომიკური ზონის მოწყობაზე 2010 წლის აგვისტოში ოფიციალურად განაცხადა. მთავრობის ინფორმაციით, თბილისში თავისუფალი ინდუსტრიული ზონა 109 კვ/კმ-ზე მოეწყობა და ფუნქციონირებას ოფიციალურად 2012 წლის 1-ლი ივნისიდან დაიწყებს.
როგორც მაშინ ეკონომიკისა და მდგრადი განვითარების მინისტრმა ვერა ქობალიამ განაცხადა, აეროპორტის მიმდებარედ შეიქმნება თავისუფალი ინდუსტრიული ზონა, სადაც 1500-ზე მეტი ადამიანი დასაქმდება.
"საქართველოს ეკონომიკისათვის თბილისის თავისუფალი ინდუსტრიული ზონის შექმნა მნიშვნელოვანი ფაქტია. ეს იქნება ადგილი, სადაც დაახლოებით 1500-ზე მეტი ადამიანი დასაქმდება. გვექნება საშუალება ექსპორტის დივერსიფიკაციისათვის და შესაძლებლობა გავზარდოთ მისი მოცულობა. თავისუფალ ინდუსტრიულ ზონაში რამდენიმე პროექტი განხორციელდება. მათ შორის, საუბარია ელექტრომოწყობილობებსა და დაცვის საშუალებებზე", _ განაცხადა ქობალიამ.
ამ დროისათვის ქვეყნის მასშტაბით კიდევ ორი თავისუფალი ინდუსტრიული ზონა იქმნება _ ქუთაისსა და ფოთში. თუმცა მთავრობა ინტენსიურად მუშაობს, რომ ასეთი ზონა შეიქმნას ხელვაჩაურში, რაზეც თურქ ინვესტორებთან მოლაპარაკებებს აწარმოებს.