კომპანია "ქუალითი შუგარი" საცალო ქსელში შაქარზე ფასების ზრდას სავაჭრო ობიექტების მფლობელების ერთპიროვნულ გადაწყვეტილებას უკავშირებს. კომპანიის დირექტორი ალხან ალიზადე სააგენტო "ჯი-ეიჩ-ენთან" საუბრისას აცხადებს, რომ შაქრის მწარმოებელ კომპანიას შაქარზე ფასები არ გაუზრდია.
"ჩვენ ფასები არ გაგვიზრდია და ვერაფერს გეტყვით, თუ რამ გამოიწვია საცალო ქსელში შაქარზე ფასების მატება. კომპანიამ საკმაო მარაგები შემოიტანა საქართველოში და შესაბამისად ეს მარაგები ჯერაც არსებობს. უნდა აღინიშნოს, რომ რეგიონში და უშუალოდ საქართველოში შაქარი ყველაზე დაბალ ფასად იყიდება. რუსეთში და აზერბაიჯანში დღეისათვის შაქრის ფასი ტონაზე 1250 დოლარია და საქართველოში მისი ფასი ტონაზე 1110 დოლარს შეადგენს. შესაბამისად, ჩვენ არავითარი რეალური საფუძველი არ გვქონდა ფასები გაგვეზარდა. ერთადერთი მიზეზი, რასაც შეიძლება ფასების ზრდა დავუკავშიროთ, ეს არის მედიაში გავრცელებული ინფორმაციები, რომ მსოფლიოს სხვადასხვა რეგიონებში არის გვალვა, მოუსავლიანობა. თუმცა პირდაპირ გეუბნებით, რომ ამ ეტაპზე ჩვენ ფასები არ გავიზრდია და საცალო ქსელში ფასების გაზრდა ჩვენს კომპანიას არა და ვერ დაუკავშირდება",- აცხადებს "ქუალითი შუგარის" დირექტორი ალხან ალიზადე.
მისივე განმარტებით, მსოფლიო ბირჟებზე შაქარზე ფასების ცვლილებებმა საქართველოში შაქრის ფასზე შესაძლოა გარკვეული კორექტივები გამოიწვიოს.
"ამისგან დაზღვეული არავინაა, მაგრამ კიდე ერთხელ ვიმეორებ, რომ ფასების ზრდა ჩვენ არ გვიკავშირდება",- განმარტა ალიზადემ.
შეგახსენებთ, რომ საქართველოში არსებული ერთადერთი შაქრის გადამამუშავებელი ქარხანა ფუნქციონირებს.
აგარის შაქრის ქარხნის მართვას კომპანია "აგარა შუგარ მენეჯმენტი" ახორციელებს. "აგარ შუგარ მენეჯმენტს", ხელშეკრულების თანახმად, თურქულ-აზერბაიჯანული კომპანია "ქუოლითი შუგარი" შაქრის ნედლეულით ამარაგებს და შაქრის დისტრიბუციასაც ახორციელებს.
დღეისათვის ერთი ტომარა შაქრის ფასი 79 ლარია.