მოლდოვის პრეზიდენტის, მაია სანდუს მრჩეველმა ეროვნული უსაფრთხოების საკითხებში, სტანისლავ სეკრიერუმ განაცხადა, რომ საპრეზიდენტო არჩევნების მეორე ტურში რუსეთის მასობრივი ჩარევა მიმდინარეობს.
"ჩვენ ვხედავთ რუსეთის მხრიდან მასობრივ ჩარევას ჩვენს საარჩევნო პროცესში". - წერს სეკრიერუ.
მისი თქმით, საუბარია კენჭისყრის შედეგების დამახინჯების მაღალი პოტენციალის მქონე ძალისხმევაზე.
სეკრიერუმ აღნიშნა, რომ ხელისუფლება მაღალ მზადყოფნაშია.
დნესტრისპირეთის რეგიონში ამომრჩევლების ორგანიზებული ტრანსპორტირება მიმდინარეობს, რაც მოლდოვის "საარჩევნო კოდექსის" მიხედვით არალეგალურია.
"11:00 საათისთვის აქტივობა უკვე აღემატებოდა [საპრეზიდენტო არჩევნების] პირველ ტურში [ამომრჩევლების] სრულ რაოდენობას". - დაამატა მან.
სეკრიერუ ასევე რუსული სამთავრობო პროპაგანდისტული მედია „სპუტნიკის“ მიერ გამოქვეყნებულ ვიდეოს ავრცელებს, რომელშიც ჩარტერული რეისით მოლდოვური პასპორტის მქონე ადამიანები იმყოფებიან, რაც სეკრიერუს თქმით, "დიდი მასშტაბის, ამომრჩეველთა ორგანიზებული ტრანსპორტირების აშკარა მტკიცებულებაა".~ სანდუს მრჩეველი ასევე ამატებს, რომ ქვეყნის კიბერუსაფრთხოების სააგენტოს ცნობით, არჩევნების დღის დილის საათებში ამომრჩევლების ინფორმირებისთვის განკუთვნილი ცენტრალური საარჩევნო კომისიის საიტი DDoS ტიპის კიბერთავდასხმის გამო დროებით გათიშული იყო.
„მიიღება დამატებითი ღონისძიებები საარჩევნო პროცესის შეუფერხებლად წარმართვის უზრუნველსაყოფად“, - აღნიშნა მრჩეველმა.
არჩევნების პირველ ტურში, რომელიც 20 ოქტომბერს გაიმართა, სანდუმ ხმების 42.45% მიიღო, ხოლო სტოიანოგლომ – 25.98%.
