საქართველოს საგარეო საქმეთა სამინისტრო ისრაელის საგარეო საქმეთა სამინისტროდან წერილის მიღების ფაქტს ადასტურებს. როგორც "ჯი-ეიჩ-ენს" საგარეო უწყებაში განუცხადეს, სამინისტროში გრიგოლ ვაშაძის სახელზე ისრაელის საგარეო საქმეთა მინისტრ ავიგდორ ლიბერმანისგან წერილი მართლაც შევიდა, თუმცა მის შინაარსთან დაკავშირებით გავრცელებული ინფორმაცია გადაჭარბებულია.
"გავრცელებული ინფორმაცია, რომ წერილი "მკაცრი შინაარსისაა", გადაჭარბებულია. ამ ეტაპზე სხვა კომენტარის გაკეთება არ შეგვიძლია", - აცხადებენ საგარეო უწყებაში.
შეგახსენებთ, რომ ისრაელის საინფორმაციო სააგენტო IzRus -ის ინფორმაციით, ისრაელის საგარეო საქმეთა მინისტრმა ავიგდორ ლიბერმანმა ქართველ კოლეგა გრიგოლ ვაშაძეს "მკაცრი წერილი" გაუგზავნა, რომელშიც ქართველი სამართალდამცველების მიერ დაკავებული ისრაელელი ბიზნესმენების: რონ ფუქსისა და ზეევ ფრენკელის დაუყოვნებლივი გათავისუფლება მოითხოვა.
აღნიშნული სააგენტოს ინფორმაციით, წერილში ლიბერმანი ისრაელის მოქალაქეების დაკავებას "უსაფუძვლოს" უწოდებს და "გამოგონილი მიზეზით" ხსნის.
ამასთან, ისრაელის საგარეო საქმეთა მინისტრი ხაზს უსვამს, რომ აღნიშნული ფაქტი ორი ქვეყნის ეკონომიკურ და პოლიტიკურ ურთიერთობებზე უარყოფით გავლენას იქონიებს.
"ბიზნესმენების დაკავების ფაქტი ანგრევს ყველანაირ ეკონომიკურ კონტაქტებს, რომელიც ბოლო წლების განმავლობაში ორ ქვეყანას შორის ძალიან სწრაფი ტემპებით ვითარდებობა. მომხდარის შემდეგ საქართველოში ბიზნესის წარმოების სურვილი ისრაელელ ბიზნესმენებს აღარ აქვთ", - ნათქვამია წერილში.
როგორც ცნობილია, ისრაელის მოქალაქეები, ბიზნესმენები რონი ფუქსი და ზეევ ფრენკელი, ბათუმში 14 ოქტომბერს დააკავეს. მათ აღმკვეთი ღონისძიების სახით პატიმრობა აქვს შეფარდებული.
