25-26 იანვარს თბილისში, ბაქო-თბილისი-ყარსის სარკინიგზო მაგისტრალის მშენებლობასთან დაკავშირებით, საქართველოს, თურქეთისა და აზერბაიჯანის ტრანსპორტის მინისტრებისა და სამუშაო ჯგუფის წევრების შეხვედრა გაიმართება.
აზერბაიჯანული მედიის ინფორმაციით, თბილისში დაგეგმილ სხდომაზე განხილული იქნება რკინიგზის მშენებლობასთან დაკავშირებული ყველა საკითხი. სხდომაზე განიხილება ასევე ბაქო-თბილისი-ყარსის სარკინიგზო მაგისტრალის საქართველოს მონაკვეთის მშენებლობისათვის დამატებითი დაფინანსების გამოყოფის საკითხი.
შეგახსენებთ, რომ სამთავრობო დონეზე უკვე გავრცელებულია ინფორმაცია იმის შესახებ, რომ აზერბაიჯანი მზადაა საქართველოს დამატებით 50 მლნ. დოლარი გამოუყოს, მაშინ როდესაც აზერბაიჯანმა მაგისტრალის ქართული მონაკვეთიხ მშენებლობისათვს 200 მლნ. დოლარი უკვე გამოყო.
ბაქო-თბილისი-ყარსის პროექტის ფარგლებში 105 კმ. ახალი სარკინიგზო მაგისტრალის მშენებლობა იგეგმება, საიდანაც 76 კმ. თურქეთზე, ხოლო 29 კმ. საქართველოზე გაივლის. პარალელურად რეკონსტრუქცია უტარდება ახალქალაქი-მარაბდა-თბილისის სარკინიგზო მონაკვეთს, რითაც მისი ტვირთბრუნვა წელიწადში 15 მლნ. ტონამდე გაიზრდება.