დღეს 17 იანვარს 15;00 საათზე საქართველოს ეკონომიკის და მდგრადი განვითარების სამინისტროში ეკონომიკის სამინისტროსა და მსოფლიოში ერთ-ერთი წამყვანი სატელეკომუნიკაციო კომპანია "ალკატელ-ლუსენტის" ინიციატივის პრეზენტაცია გაიმართება.
პრეზენტაცია გულისხმობს საქართველოს ტექნიკურ უნივერსიტეტში კავშირგაბმულობის ფაკულტეტის ბაზაზე ულტრა თანამედროვე საინფორმაციო ტექნოლოგიური ლაბორატორიის დაფუძნებას.
აღნიშნული ლაბორატორია საშუალებას მისცემს სტუდენტებს, პრაქტიკული ცოდნა და გამოცდილება მიიღონ სატელეკომუნიკაციო და საინფორმაციო ტექნოლოგიების უკანასკნელ გადაწყვეტილებებთან მუშაობის შედეგად, ჩაატარონ ცდები, შექმნას ახალი გადაწყვეტილებები ციფრული სატელეკომუნიკაციო და მობილური ტექნოლოგიებისათვის.
აღსანიშნავია, რომ ეს იქნება კავშირგაბმულობის ფაკულტეტის ბაზაზე სატელეკომუნიკაციო და საინფორმაციო ტექნოლოგიების მიმართულებით მომუშავე კომპანიის მიერ პირველი ასეთი ტიპის კვლევითი ლაბორატორიის გახსნა.
ლაბორატორია მაღალი კვალიფიკაციის სპეციალისტების მომზადებაში მნიშვნელოვან წვლილს შეიტანს და ქართველი სპეციალისტების კონკურენტუნარიანობას გაზრდის.
მისი მონტაჟის დასრულება პირველი კვარტლის ბოლოსათვის განორციელდება.