კომპანია „ჯოილენდიმ" დაბა ბაკურიანში თანამედროვე სტანდარტების შესაბამისი გასართობი პარკი გახსნა. პარკი 7000 კვ/მ ფართობზეა გადაჭიმული, რომელიც "ჯოილენდიმ" სახელმწიფოსგან იჯარით აიღო.
კომპანიის ხელმძღვანელი ზვიად ბეგლარიშვილი აცხადებს, რომ სახელმწიფოსთან გაფორმებული ხელშეკრულების თანახმად, მშენებლობა 2012 ზამთრის სეზონისათვის უნდა დასრულებულიყო, თუმცა ამ დროისათვის სამუშაოების ძირითადი ნაწილი ფაქტობრივად დასრულებულია და პარკი დამსვენებლებს უკვე იღებს.
პარკში შესვლა ფასიანია და ერთი საათის განმავლობაში პარკში შესვლა და არსებული ინფრასტრუქტურით სარგებლობა 7 ლარია. 2 საათის ღირებულება 10 ლარს, ხოლო ნახევარი დღით პარკში შესვლა დამსვნებელს 15 ლარი დაუჯდება. მთელი დღის განავლობაში პარკში დასვენება და სრული სერვისით სარგებლბა დამსვენებლისათვის 20 ლარი ღირს.
პარკში ავსტრიული კომპანია SunKid Skilift-Foerdertechnik GmbH - ის თანამედროვე ლენტური ტიპის 100 მეტრის სიგრძის ესკალატორია (საბაგირო გზა) დამონტაჟებული. ესკალატორი - იგივე მოძრავი ხალიჩა პარკის შუაშია მოწყობილი და პარკს ორ ძირითად ნაწილად - სათხილამურო-სკილენდად და სატუბინგო-ტუბინგლენდად ყოფს.
ტუბინგი - საუკეთესო ატრაქციონი ოჯახური დასვენებისათვის, სადაც სპეციალურ ტრასაზე ტუბებით - ფერადი, გასაბერი ციგებით - ყველა ასაკის ადამიანი სიამოვნებით ისრიალებს. ტუბინგლენდში ასევე მოწყობილია გასართობი პარკი ბავშვებისათვის კარუსელითა და მრავალი გასართობი სათამაშოებით.
კომპანია „ჯოილენდი" ხელმძღვანელი ზვიად ბეგლარიშვილი აცხადებს, რომ პარკში ამ დროისათვის 400 ათასი დოლარის ინვესტიციაა განხორციელებული. მისივე ინფორმაციით, პარკს სრულყოფილი ამუშავებისათვის დამატებით, 100 ათასი დოლარია საჭირო, რომლის გამოყოფაზეც "ჯოილენდი" უახლოეს დღეებში პარტნიორებთან მოლაპაარკებებს დაიწყებს.
"ჯოილენდის" მენეჯმენტი აცხადებს, რომ პარკში ყველა ასაკის დამსვენებელი დაისვენებს და აბსოლუტურად უსაფრთხო გარემოში გაერთობა.