"რიჩარდ ჰოლბრუკის დამსახურებაცაა, რომ საქართველოს დედაქალაქი, თბილისი გადარჩა", _ აღნიშნა მიხეილ სააკაშვილმა ბი-ბი-სისთვის მიცემულ ინტერვიუში, როცა გადაცემის წამყვანი თბილისის ერთ-ერთი ქუჩისთვის რიჩარდ ჰოლბრუკის სახელის მინიჭებით დაინტერესდა.
"ეს გადაწყვეტილება თბილისის საკრებულომ მიიღო და ვფიქრობ, მან ეს ნამდვილად დაიმსახურა. ომის შემდეგ ბევრი აცხადებდა, რომ ქვეყანა დაიღუპება და მთავრობა ჩამოიშლება, რიჩარდ ჰოლბრუკი კი მეუბნებოდა, რომ ამ სტატიებისთვის ყურადღება არ უნდა მიმექცია. თუ ორი წლის პერიოდში ხალხი დაინახავს, რომ თქვენი სახელმწიფო და ეკონომიკა გადარჩა, მაშინ ქვეყანაც გადარჩება და დაკარგულსაც აინაზღაურებთ," _ აღნიშნა საქართველოს პრეზიდენტმა ცნობილი ამერიკელი დიპლომატის გახსენებისას.
სააკაშვილის თქმით, ჰოლბრუკს ჰქონდა სტრატეგიული ხედვა და რწმენა, რომ, საბოლოო ჯამში, საქართველო აუცილებლად გაათავისუფლებს ოკუპირებულ ტერიტორიებს.
შეგახსენებთ, ამერიკაში ვიზიტით მყოფმა მიხეილ სააკაშვილმა ბი-ბი-სის- წამყვანს ვრცელი ინტერვიუ მისცა და ქართველი ხალხის წინაშე რიჩარდ ჰოლბრუკის დამსახურებაზე ისაუბრა.
