“პირველად რომ ვთქვით, რომ ტურისტული ცენტრი იქნებოდა, ხალხმა სიცილი დაიწყო, რა უნდა ლოპოტაზე ტურისტულ სივრცესო, აბა ჩავიდეთ ახლა, ლოპოტა რა არის? ეს არის ხედვა და სამშობლოს სიყვარული.” - ამის შესახებ “ერთიანობა-ნაციონალური მოძრაობის” ერთ-ერთმა ლიდერმა, გიორგი ვაშაძემ ყვარელში გამართულ ღონისძიებაზე სააკაშვილთან დაკავშირებით განაცხადა.
ვაშაძის თქმით, სააკაშვილის ხელისუფლების დროს კახეთში ხალხისთვის არაერთი პროექტი განხორციელდა, ხოლო “ოცნება” მხოლოდ სასახლეების მშენებლობითაა დაკავებული:
“სააკაშვილის ამბავი ვახსენეთ და ახლა სადაც ვდგავართ, ყვარლის ტბა, იუსტიციის სასწავლო ცენტრი უსწრაფესად აგვაშენებინა, ლოპოტაა აქედან რამდენიმე კილომეტრში და პირველად რომ ვთქვით, რომ ტურისტული ცენტრი იქნებოდა, ხალხმა სიცილი დაიწყო, რა უნდა ლოპოტაზე ტურისტულ სივრცესო, აბა ჩავიდეთ ახლა, ლოპოტა რა არის? ეს არის ხედვა და სამშობლოს სიყვარული, მაგრამ მათ უნდათ, რომ მარტო მთა გადაჭრა, თავისთვის სასახლე აიშენონ და ღარიბმა ადამიანებმა მათ მდიდრულ სასახლეებს უყურონ, ამას კი ჩვენ არ შევეგუებით არც ერთ შემთხვევაში.
ამიტომაც იმ 14 მილიარდში, რომელიც მოგვაქვს, გათვალისწინებულია 120 მილიონი მარტო მევენახეობისთვის, იგივე სოფლის მეურნეობის სუბსიდირებაზე მინიმუმ მილიონი ევრო მოდის, მარტო ვაზზე ხომ არ არის? კახეთში მეხორბლეობაცაა განვითარებული, როგორ შეიძლება ხორბლის მოსავალი ულპებოდეს ადამიანს, როცა პურის დეფიციტია მსოფლიოში, მაგრამ მათ აქვთ მონოპოლიები, მათ ყველაფერი, ხალხს არაფერი, სადამდე შეიძლება ეს ყველაფერი მოვითმინოთ?
აუცილებლად დიდი გამარჯვება იქნება 26 ოქტომბერს, კახეთში გვყავს ძალიან მაგარი გუნდი, ბოტკოველი, ბეჟაშვილი, ცისკარიშვილი. თქვენ ყველა, ვინც აქ ხართ, თქვენ ხართ საქართველოს ნამუსი და სინდისი, თქვენ რომ არ იყოთ საქართველო ფეხზე არ იქნებოდა, თქვენ რომ არ იყოთ, ახლა აქ იქნებოდა რუსეთი, თქვენ რომ არ იბრძოდეთ, საქართველო ევრაზიულ კავშირში იქნებოდა გაწევრიანებული.” -განაცხადა ვაშაძემ.
