ბათუმში კრის დე ბურგის კონცერტი და მისი პირდაპირი ტელეტრანსლაცია 1 683 000, პლასიდო დომინგოს გალა-კონცერტი 737 500, მაია ქეის შოუ პროგრამა კი 371,3 ათასი ლარი დაჯდა. შესაბამის ინფორმაციას "ეროვნული ფორუმის" ეკონომიკური მიმართულების ხელმძღვანელი ნოდარ ჯავახიშვილი ავრცელებს.
როგორც მან დღეს გამართულ პრესკონფერენციაზე განაცხადა, მონაცემები პრეზიდენტისა და მთავრობის სარეზერვო ფონდების შესაბამისი ხარჯთაღრიცხვიდან გააჩნია.
"უფასო კონცერტები, როგორც ამას ხელისუფლება ამტკიცებდა, სინამდვილეში ძალიან ძვირი დაჯდა და მისი მოწყობისთვის თანხმები თითოეული ჩვენგანის სისხლითა და ოფლით შევსებული ბიუჯეტიდან დაიხარჯა", - განაცხადა ჯავახიშვილმა.
შეგახსენებთ, რომ "ეროვნული ფორუმის" მიერ გამოქვეყნებული ეს მონაცემები პირველია, რაც კი აღნიშნული კონცერტების ხარჯებთან დაკავშირებით გავრცელებულა, რადგან ოფიციალური უწყებები მას ამ დრომდე ასაიდუმლოებენ.
