მთავრობამ 2011 წლის სოფლის მხარდაჭერის პროგრამის დეტალები დააზუსტა. პროგრამის განსახორციელებლად წელს მთავარ საფინანსო დოკუმენტში 40 მილიონი ლარია გათვალისწინებული.
ფინანსთა სამინისტროს ინფორმაციით, აღნიშნული თანხა სოფლებზე შემდეგნაირად გადანაწილდება: არა უმეტეს 50-სულიანი სოფლისათვის _ 2000 ლარი; 51-დან 200-სულამდე სოფლისათვის - 4 000 ლარი; 201-დან 400-სულამდე სოფლისათვის - 5 000 ლარი; 401-დან 1 000-სულამდე სოფლისათვის - 8 000 ლარი; 1 000-ზე მეტსულიანი სოფლისათვის - 12 000 ლარი.
სამინისტროში განმარტავენ, რომ პროგრამის ფარგლებში დასაფინანსებელი პროექტების გაანგარიშების შემდეგ პროგრამით გათვალისწინებული დარჩენილი თანხა სოფლებისათვის ნაწილდება ერთ სულ მოსახლეზე გაანგარიშებული მაჩვენებლის მიხედვით. აღნიშნული მაჩვენებლები გაიანგარიშება სოფლის მოსახლეობის რაოდენობისა და 8,040115 კოეფიციენტის ნამრავლით.
მთავრობის გადაწყვეტილებით, სოფლის მხარდაჭერის პროგრამით სოფლისათვის გამოყოფილი თანხის გამოყენების მიზნობრიობის განსაზღვრის კრიტერიუმებია: განსახორციელებელი პროგრამით სარგებლობის საშუალება უნდა ჰქონდეს სოფლის მოსახლეობის უმრავლესობას; შესყიდულ სამუშაოს (საქონელს, მომსახურებას) უნდა გააჩნდეს ხანგრძლივი გამოყენების დანიშნულება და არ უნდა იყოს მიმართული ერთჯერადი, მოკლევადიანი მოხმარებისათვის; სამუშაოთა შესასრულებისას სოფლის მო¬სახლეობა უნდა დასაქმდეს; საერთო ინტერესების გათვალისწინებით დასაშვებია რამდენიმე სოფლისათვის გამოყოფილი თანხის გაერთიანება ამ სოფლების საერთო პრობლემის (მაგალითად, წყალსადენის სათავო ნაგებობის ან სარწყავი სისტემის გაწმენდა-რეაბილიტაცია, რომელიც რამდენიმე სოფელს ემსახურება) გადასაწყვეტად.
შეგახსენებთ, რომ 2009 წელს სოფლის მხარდაჭერის პროგრამის განხორციელებაზე 3 468 სოფელში 20 მილიონი ლარი დაიხარჯა. რეგიონალური განვითარებისა და ინფრასტრუქტურის სამინისტროს ინფორმაციით, 2009 წელს სოფლის მხარდაჭერის პროგრამიდან ყველაზე მეტი თანხა იმერეთს მოხმარდა. 2009 წელს იმერეთში სოფლის მხარდაჭერის პროგრამისთვის დახარჯულია 3 463 326 ლარი.
მნიშვნელოვანი პროექტები განხორციელებულა ასევე 2009 წელს ქვემო ქართლში. ქართლში დახარჯულია 2 697 534 ლარი, რაც სოფლის მხარდაჭერის პროგრამის საერთო ბიუჯეტის 13,7 პროცენტია. O
ოფიციალური სტატისტიკის თანახმად, ყევლაზე ნაკლები თანხა სოფლის მხარდაჭერის პროგრამისათვბის დაიხარჯა რაჭა-ლეჩხუმსა და ქვემო სვანეთში, სადაც 2009 წელს აღნიშნული პროგრამიდან 737 235 ლარის სამუშაო დაფინანსდა.
რეგიონალური განვითარებისა და ინფრასტრუქტურის სამინისტროს ინფორმაციით, სოფლის მხარდაჭერის პროგრამაში მონაწილე სოფლებიდან ყველაზე მეტ სოფელს სასმელი წყლის სისტემების რეაბილიტაციის და შიდა გზების პრობლემა აწუხებდა.
