ქართველი ხალხი „ქართულ ოცნებასთან“ ერთად იქნება ის, ვინც თავის ბედს თვითონვე განსაზღვრავს და უზრუნველყოფს ამ ქვეყნის ნათელ მომავალს, ევროპული ოჯახის სრულფასოვან წევრობას, – აამის შესახებ პარტია „ქართული ოცნების“ აღმასრულებელი მდივანმა, მამუკა მდინარაძემ განაცხადა.
მისივე თქმით, შიდა ქართლში მცხოვრებმა ხალხმა საკუთარ თავზე გამოცადა ოკუპაცია და წინა ხელისუფლების ქმედებებისგან გამოწვეული ზიანი.„მივესალმები შიდა ქართლს. მივესალმები გორს, კასპს, ქარელს, ხაშურს. მივესალმები საოკუპაციო ხაზთან მცხოვრებ ჩვენს თანამოქალაქეებს და ოთხივე მუნიციპალიტეტში მცხოვრებ ჩვენს დევნილ მოსახლეობას. მივესალმები ჩვენს დელეგატობის კანდიდატებს, ბატონ ლადო ხინჩეგაშვილს და ბატონ ზაზა დუგლაძეს, ღირსეულ ხალხს, რომლებიც წარმოადგენენ საქართველოს პარლამენტში შემდეგ მოწვევაში თქვენს რეგიონს.
შიდა ქართლში მცხოვრებმა ხალხმა საკუთარ თავზე გამოცადა როგორც ოკუპაციის, ასევე საკუთარი ხელისუფლების, 2012 წლამდე მაქვს საუბარი, ქმედებებისგან გამოწვეული ზიანი. თქვენ იქით შეგიძლიათ მოუყვეთ და ასწავლოთ სხვა ქვეყნის მოქალაქეებს ოკუპაციის, ომის, მათი თანმდევი წარუშლელი დაღის და მეორე მხრივ, მშვიდობის მნიშვნელობის შესახებ. ქართლის ისტორიაც ეს არის. მშვიდობისთვის, ღირსებისთვის, რწმენისთვის და სამშობლოსთვის უღალატო ბრძოლის ისტორია და არა უცხო ძალების დავალებების შესრულება.
აგენტურული პარტიები დღეს ლაპარაკობენ ერთ ხმაში და ხშირად მოისმენთ მათგან – უცხოეთიდან შემაშფოთებელი გზავნილები ისმის და ასე შემდეგ. შემაშფოთებელი კი არა გამაფრთხილებელი გზავნილებიც კი არ გვახსოვს, როცა პირდაპირ ქუჩაში კლავდნენ ახალგაზრდა ბიჭებს. ხალხს ღამე ბიზნესებს აფორმებინებდნენ სხვებზე, არეკეტებდნენ, ტელევიზიებს იტაცებდნენ, ტერიტორიებს რუსეთს აბარებდნენ. მაშინ არათუ შემაშფოთებელი, ელემენტარული გაფრთხილების მიმანიშნებელი გზავნილებიც კი არ გვახსოვს და დღეს პირიქით, თურმე შემაშფოთებელი გზავნილები ისმის. კარგად უნდა დავფიქრდეთ რასთან არის ეს ყველაფერი დაკავშირებული. რა ინტერესია ასეთი საქართველოს მიმართ. მათ მიერ დანიშნული ოპოზიცია ვერ მოდის თქვენთან, ამ ხალხთან ვერ მოდის, ვერ გელაპარაკებიან. პრაქტიკულად არ ატარებენ ისინი საარჩევნო კამპანიას. სამაგიეროდ ისინი დადიან სხვადასხვა ქვეყნებში ზოგან ღიად, ზოგან ფარულად იმისთვის, რომ უცხოეთიდან რაც შეიძლება მეტი შემაშფოთებელი გზავნილი წამოვიდეს“, – აღნიშნა მდინარაძემ.
მამუკა მდინარაძის განცხადებით, „ქართული ოცნების“ მმართველობის პირობებში ომის რისკი ნულამდე იყო შემცირებული.
ქვეყნის გარედან რაც შეიძლება მეტი მაშველი რგოლი გადმოუგდონ წყალწაღებულ ოპოზიციას, რომელსაც მაინც არაფრის შანსი აქვს, რადგან ქართველებმა კარგად გავაანალიზეთ წარსულიც, აწმყოც და ქართველი ხალხი ჩვენთან, „ქართულ ოცნებასთან“ ერთად იქნება ის, ვინც თავის ბედს თვითონვე განსაზღვრავს და უზრუნველყოფს ამ ქვეყნის ნათელ მომავალს, ევროპული ოჯახის სრულფასოვან წევრობას. ისევე როგორც ჩვენ ყველამ ერთად უზრუნველვყავით, რომ ჩვენი მმართველობის პირობებში ომის რისკი დასულიყო ნულამდე. ისევე როგორც დავიცავით ჩვენი ქვეყნის ღირსება და საქართველო შედგა, როგორც დამოუკიდებელი, სუვერენული სახელმწიფო და მომავალში ასე გაგრძელდება. მომავალში ჩვენ უნდა განვამტკიცოთ დამოუკიდებლობის და სუვერენიტეტის ხარისხი. ისევე როგორც უკანასკნელ წლებში ჩვენ შევძელით პირველ ადგილზე ვყოფილიყავით ევროპაში ეკონომიკური ზრდის მაჩვენებლით, რაც იმის გარანტია და უტყუარი დასტურია, რომ კეთილდღეობა მხოლოდ ამ გზით მიიღწევა. ამიტომ, მხოლოდ შვიდობით, მხოლოდ ღირსებით, მხოლოდ კეთილდღეობით ევროპისკენ. ეს არის ჩვენი სლოგანიც, დევიზიც და ის გზა, რომელზეც უნდა ვიაროთ.
მე მინდა კიდევ ერთხელ მოგესალმოთ და მივესალმო ჩვენს ჩემპიონებს ლაშას და განსაკუთრებით, აი აქ გენო პეტრიაშვილს. კაცი, რომელიც სიამაყის სიმბოლოა და თქვენ აქაურებს განსაკუთრებით გეამაყებათ. ჩვენ ქვეყანას, ჩვენს სიამაყეს გაუმარჯოს. ჩვენს ჩემპიონებს გაუმარჯოს. ჩვენს ქართულ ოცნებას გაუმარჯოს“, – აღნიშნა მამუკა მდინარაძემ.
