უკრაინის პრეზიდენტმა ვოლოდიმირ ზელენსკიმ განაცხადა, რომ სრულმასშტაბიანი შეჭრის პერიოდში რუსმა ოკუპანტებმა ჩაიდინეს 137 ათასი სამხედრო დანაშაული და მათ მიმართ ნაკლები სასჯელი არ უნდა იყოს.
„სამართლიანობა აერთიანებს ადამიანებს, რადგან სამართლიანობის სურვილი არის ჩვენი ადამიანური კულტურის საფუძველი. ახლა სამართლიანობის სურვილი, რომელიც გვაერთიანებს თქვენ, მე და ყველას, ვინც ჩვენთან ერთად მუშაობს ხალხის სიცოცხლისა და ჩვენი ქვეყნის დასაცავად რუსეთის ფედერაციისგან.
დღეს არის სულ მცირე 137 ათასი მიზეზი, რომ ეს საქმე გავაგრძელოთ და ბოლომდე მივიყვანოთ.
137 ათასი - ზუსტად ამ დროისთვის რუსეთის მიერ ჩადენილი სამხედრო დანაშაული. ეს არის ის, რაც ცნობილია.
დანაშაული მშვიდობისა და კაცობრიობის წინააღმდეგ, ჩვენი სახელმწიფოს წინააღმდეგ, ჩვენი ხალხის წინააღმდეგ, უკრაინისა და უკრაინელების წინააღმდეგ.
და ეს ნიშნავს, რომ არ უნდა იყოს ნაკლები სასჯელი“, - თქვა ზელენსკიმ.
მან აღნიშნა, რომ სიტყვა „სამართლიანობა“ განსხვავებულად ჟღერს მსოფლიოს სხვადასხვა ენაზე, მაგრამ ყველგან ერთნაირად უნდა აღიქმებოდეს.
„ყველა ერს ესმის სამართლიანობის ფასი ყველა სახელმწიფოში, რომელიც ჭეშმარიტად პატივს სცემს ადამიანის სიცოცხლეს და საერთაშორისო კანონს, უბრალოდ არ შეიძლება, რომ არ იყოს სამართლიანობა. ხაზგასმით აღვნიშნავ, რომ ყველა სახელმწიფოში, მიუხედავად იმისა, თუ როგორ იწერება მისი ეროვნული კანონმდებლობა, რა საერთაშორისო ხელშეკრულებები აქვს რატიფიცირებული და ამოქმედდა თუ არა რომის სტატუტი ამა თუ სხვა სახელმწიფოს ტერიტორიაზე“, - აღნიშნა ზელენსკიმ.
