რუსეთის, აზერბაიჯანისა და სომხეთის საგარეო საქმეთა მინისტრების შეხვედრა სავარაუდოდ მიმდინარე თვეს გაიმართება. განცხადება ამის შესახებ რუსეთის საგარეო საქმეთა მინისტრმა სერგეი ლავროვმა დღეს მოსკოვში მიმდინარე 2010 წლის შემაჯამებელ პრესკონფერენციაზე გააკეთა.
"დიახ, მოსალოდნელია, ვფიქრობ მიმდინარე თვეში", _ განაცხადა მან კითხვაზე პასუხის გაცემისას მოსალოდნელია თუ არა ამგვარი შეხვედრა. აღსანიშნავია, რომ ეს შეხვედრები ყარაბაღის კონფლიქტის ირგვლივ მიმდინარე დარეგულირების პროცესს ეხება.
გასული წლის ნოემბერში რუსეთის, აზერბაიჯანისა და სომხეთის საგარეო საქმეთა მინისტრები ერთმანეთს მოსკოვში ერთხელ უკვე შეხვდნენ და მთიანი ყარაბაღის კონფლიქტზე ისაუბრეს. ყარაბაღის კონფლიქტი 1988 წელს დაიწყო, როდესაც უმეტესად სომეხი ეროვნების მოსახლეობით დასახლებულმა მთიანი ყარაბაღის ავტონომიურმა ოლქმა აზერბაიჯანის სსრ-დან გამოსვლის შესახებ განცხადება გააკეთა.
