ბიჭვინთაში "მოსკოვის პატრიარქატის საკულტო კომპლექსი შენდება". - ინფორმაციას ამის შესახებ რუსი მღვდელი იაკოვ კროტოვი ავრცელებს, თავის სტატიაში, რომელიც რუსეთის პატრიარქის კირილის საქმიანობას ეხება, კერძოდ მის რასისტულ გამონათქვამებს. სტატიის სახელწოდებაა - "პატრიარქი რასისტულ სიყალბეს იმეორებს".
"როგორც აღმოჩნდა, პრეზიდენტის საქმეთა სამმართველო ბიჭვინთაში "მოსკოვის საპატრიარქოს საკულტო კომპლექსს აშენებს", ამისათვის უკვე გაჩეხილია ნაკრძალის ადგილი ცნობილი ფიჭვებით. რა თქმა უნდა პრეზიდენტის სამმართველო აცხადებს, რომ არც ერთი ფიჭვი მოჭრილი არ არის, თუმცა ამერიკულ საძიებო სისტემა "გუგლში" არსებული ფოტოები სულ სხვა რამეზე მეტყველებენ... მთავარი კი ის არის, რომ არავის ეჭვიც არ ეპარება იმაში, რომ ამგვარი მშენებლობა შესაძლებელია", _ წერს კროტოვი და კომენტარს რუსეთის პატრიარქის იმ განცხადებაზე აკეთებს, რომლის დროსაც კირილმა განაცხადა, რომ "მოსკოვში ჩადენილი დანაშაულის 40 % ჩამოსულების ჩადენილია".
"სასულიერო პირების წინაშე სიტყვით გამოსვლისას მოსკოვში 22 დეკემბერს პატრიარქმა სწორედ ეს სიტყვები თქვა. ამართლებს თუ არა მას ის რომ ეს ციტატაა? პატრიარქმა მოსკოვის მთავარი სამმართველოს ხელმძღვანელი დაიმოწმა... არა არ ამართლებს. ჩინოვნიკების სიმართლესაც რომ ლაპარაკობდნენ - ყველაფრის გამეორება საჭირო არ არის. პატრიარქი კირილი მშვენივრად ახერხებს მრავალი რამ არ შეიმჩნიოს და მრავალი რამის ციტირება არ მოახდინოს. მან მშვენიერი ნომენკლატურული სკოლა გაიარა. ხოლო თუკი მან გადაწყვიტა, რომ რაიმის ციტირება მოახდინოს- ესე იგი მან ყველაფერი კარგად აწონ-დაწონა", _ წერს მღვდელი.