საქართველო რუსეთის ფედერაციისგან 2008 წლის აგვისტოში, საომარი მოქმედებების შედეგად, მიყენებული ზარალის ასანაზღაურებლად საერთაშორისო ინსტანციებს მიმართავს.
როგორც "ჯი-ეიჩ-ენს" საქართველოს პარლამენტის ტერიტორიული მთლიანობის აღდგენის დროებითი კომისიის ხელმძღვანელმა შოთა მალაშხიამ განუმარტა, პარლამენტის დადგენილების თანახმად, კომისია 2008 წლის ომის დროს რუსეთის მხრიდან საქართველოსთვის მიყენებულ ზარალს ცალკეული მიმართულებით შეისწავლის. ზარალის დადგენის შემდეგ ზარალის დათვლა მთავრობას დაევალება.
აღნიშნულ საკითხთან დაკავშირებით, მალაშხია თებერვლის დასაწყისში კომისიის სხდომაზე ეკონომიკისა და მდგრადი განვითარების მინისტრის ვერა ქობალიას დაბარებას გეგმავს.
"საგაზაფხულო სესიების დაწყების შემდეგ, კომისიის სხდომაზე ეკონომიკის მინისტრს მოვიწვევთ, რომ მისგან მოვისმინოთ კონკრეტულად, ამ მიმართულებით მთავრობას რა გეგმები აქვს", - განუცხადა "ჯი-ეიჩ-ენს" მალაშხიამ.
დეპუტატის თქმით, უახლოეს მომავალში შემუშავდება სამოქმედო გეგმა, რომელიც რუსეთის მიერ ქვეყნისთვის მიყენებულ ზარალს დაითვლის. შემდეგ კი, კერძო იურიდულ ფირმების საშუალებით, საერთაშორისო სასამართლოებში, კომპენსაციის მოთხოვნით, სარჩელი შევა.
მალაშხიას განმარტებით, ქართული მხარე ზარალის ანაზღურებისთვის კომპენსაციის გადახდასთან დაკავშირებით რუსეთის წინააღმდეგ სარჩელს მას შემდეგ შეიტანს, რაც ევროპის ადამიანის უფლებათა დაცვის სასამართლო საქართველოს სარჩელის განხილვას დაასრულებს. ამ სარჩელში ქართული მხარე ოფიციალურ მოსკოვს აფხაზეთსა და ცხინვალის რეგიონში ეთნიკურ წმენდის განხორცილებაში სდებს ბრალს.
"მას შემდეგ, რაც ევროპის სასამართლოში ჩვენი სარჩელის განხილვა დასრულდება, კომპენსაციის მოთხოვნით უკვე ახლა სარჩელს შევიტანთ", - აღნიშნა მალაშხიამ.
რაც შეეხება თანხის რაოდენობას. საკომპენსაციო თანხის ზუსტი ოდენობა ზარალის დათვლის შემდეგ გახდება ცნობილი. ზარალი კი, სავარაუდოდ, რამდენიმე ათული მილიარდი დოლარია.