მასმედიის ელექტრონული საშუალებებით გავრცელდა ინფორმაცია 2010 წლის დეკემბერში, ოკუპირებულ სოხუმში გამართული ე.წ. აფხაზეთში რუსეთის ფედერაციის მოქალაქეების სამესაკუთრეო უფლებების დადგენისას კანონიერების უზრუნველყოფის კომისიის მორიგ სხდომაზე მიღებული დისკრიმინაციული გადაწყვეტილების თაობაზე. ამის ფაქტზე საქართველოს საგარეო საქმეთა სამინისტრო ოფიციალურ განცხადებას აკეთებს.
ე.წ. კომისიის გადაწყვეტილებით, რომელსაც თანათავმჯდომარეობენ აფხაზეთის ე.წ. პრეზიდენტის ადმინისტრაციის უფროსი გ.ენიკი და ოკუპირებულ აფხაზეთში რუსეთის ფედერაციის ე.წ. ელჩი ს. გრიგორიევი, ეთნიკურად ქართველი რუსეთის მოქალაქეების განცხადებები აფხაზეთში არსებულ მათ ქონებასთან დაკავშირებით, კომისიის მიერ განხილული არ იქნება. ამის შესახებ ღიად განაცხადა რუსეთის ფედერაციის ოფიციალურმა პირმა - ე.წ. საელჩოს მეორე მდივანმა დ. ვიშერნიოვმა.
საქართველოს საგარეო საქმეთა სამინისტროს განცხადებით, აღნიშნული გადაწყვეტილება აშკარად ცხადყოფს, რომ რუსეთი, შიდა კანონმდებლობისა და საერთაშორისო სამართლის ნორმებისა და პრინციპების გვერდის ავლით, საკუთარი მოქალაქეების მიმართ ეთნიკური ნიშნით დისკრიმინაციულ მიდგომას ახორციელებს.
"ამგვარი მიდგომა, კიდევ ერთხელ ხაზს უსვამს იმ ფაქტს, რომ რუსეთის მიერ საქართველოსა და ეთნიკური ქართველების მიმართ გატარებული პოლიტიკა ეწინააღმდეგება საერთაშორისო სამართლისა და ადამიანის უფლებათა სამართლის სტანდარტებს და სხვა არაფერია თუ არა ეთნიკური ნიშნით დევნა. ამის შემდეგ, აღარ არის გასაკვირი 1990-იანი წლებიდან რუსეთის მიერ ოკუპირებულ ტერიტორიებზე ქართული მოსახლეობის მრავალჯერადი ეთნიკური წმენდისა და თვით რუსეთის ტერიტორიაზე 2006 წელს საქართველოს მოქალაქეებისა და ეთნიკურად ქართველების მიმართ განხორციელებული დევნისა და დისკრიმინაციის ფაქტები. განსაკუთრებულად აღმაშფოთებელია ის გარემოება, რომ რუსეთი განუწყვეტლად ცდილობს ასეთი ფაშისტური პოლიტიკის საერთაშორისო არენაზე დამკვიდრებას", - განმარტავს საქართველოს საგარეო საქმეთა სამინისტრო.
განცხადების მიხედვით, საერთაშორისო თანამეგობრობა ერთსულოვნად უჭერს მხარს აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო, იძულებით გადაადგილებულ პირთა უპირობო და ღირსეულ დაბრუნებას და მათი ქონების ხელშეუხებლობას ოკუპირებულ ტერიტორიებზე, რაზეც მეტყველებს გაეროს ფარგლებში მიღებული არაერთი რეზოლუცია თუ გადაწყვეტილება.
საგარეო საქმეთა სამინისტრო მოითხოვს ე.წ. კომისიის საქმიანობას საქართველოს ოკუპირებულ ტერიტორიაზე ორი კრიმინალურ-ფაშისტური ბანდის მიერ ნაძარცვი ქონების გაყოფის კვალიფიკაცია მიეცეს.
