რუსეთი აფხაზეთში უძრავი ქონების მქონე თავისი მოქალაქეების უფლებებს უზრუნველყოფს. ამ საკითხზე შექმნილმა კომისიამ უკვე გამიხილა ათობით საქმე და 20 მათგანი საფუძვლის მქონედ აღიარა. ეს განცხადება რუსეთის საგარეო საქმეთა მინისტრმა სერგეი ლავროვმა დღეს მოსკოვში მოწყობილ 2010 წლის შემაჯამებელ პრესკონფერენციაზე გააკეთა.
მისივე თქმით, აღნიშნულ კომისიაში შედის რუსეთის ე.წ. ელჩი აფხაზეთში სემიონ გრიგორიევი და მას აფხაზ სეპარატისტთა ლიდერი სერგეი ბაღაფში პირადად კურირებს.
"კომისიას მუშაობა დაწყებული აქვს. მან ათეულობით განცხადება უკვე განიხილა და 20 საქმე საფუძვლის მქონედ ჩათვალა და პოზიტიურად გადაწყვიტა. სხვა საქმეების მიმართ მიღებულია გადაწყვეტილება ან სასამართლო პროცედურების განახლების შესახებ ან ადმინისტრაციული გადაწყვეტილების მიღების შესახებ", _ განაცხადა ლავროვმა და დასძინა, რომ "რუსული მხარე მიზანმიმართულად წაიყვანს საქმეს იქითკენ, რომ ყველა კანონიერი პრეტენზია დაკმაყოფილებული იქნეს".
"მინდა სრული პასუხისმგებლობით ავღნიშნო, რომ ჩვენ ჩვენი რუსეთის მოქალაქეებს ეთნიკური ან ნაციონალური ნიშნით არ ვანსხვავებთ. ჩვენთვის ჩვენი ყველა მოქალაქე ჩვენი დაცვის ქვეშ იმყოფება და ჩვენ მათ უფლებებს სრულად დავიცავთ", _ აცხადებს რუსეთის საგარეო საქმეთა მინისტრი სერგეი ლავროვი.
