საერთაშორისო სავალუტო ფონდის მიერ გამოყოფილ თანხასთან დაკავშირებით საქართველოს მთავრობაში კომენტარები კეთდება.
პრემიერ-მინისტრის ნიკა გილაურის ინფორმაციით, სსფ-ის მმართველი საბჭო, გუშინ 12 იანვარს, შეიკრიბა. შეკრებაზე საქართველოს საკითხზე იმსჯელეს.
"ფონდმა საქართველოს ეკონომიკური განვითარების პოლიტიკა 2010- 2011 წლებისთვის დადებითად შეაფასა და თვითონაც არ ელოდენენ ეკონომიკის ასეთ ზრდას. ფონდმა მოიწონა ასევე 2011 წლის ბიუჯეტი. 2011 წელს საბიუჯეტო დეფიციტი მნიშვნელოვნად იქნება შემცირებული. 2009 წელს საბიუჯეტო დეფიციტმა 9,2 პროცენტი შეადგინა, ხოლო 2010 წელი 6 პროცენტიანი საბიუჯეტო დეფიციტით დავასრულეთ", - განაცხადა ნიკა გილაურმა.
პრემიერ-მინისტრის განმარტებით, საბიუჯეტო დეფიციტის შემცირება 2011 წელსაც გაგრძელდება და 2011 წლის ბოლოს დეფიციტი 4,5 - 4,9 პროცენტამდე იქნება.
პრემიერ-მინისტრმა გამოყოფილი თანხისთვის მადლობა გადაუხადა სსფ-ის მმართველ საბჭოს და სსფ-ის წარმომადგენლობას საქართველოში.
შეგახსენებთ, საერთაშორისო სავალუტო ფონდმა საქართველოს 153 მლნ დოლარის მოცულობის მორიგი საკრედიტო ტრანში გამოუყო.
საქართველოსთან სსფ-ის თანამშრომლობის პროგრამა 2011 წლის 14 ივნისამდე გაგრძელდება. მისი მიზანია - საქართველოს მაკროეკონომიკური პოლიტიკის მხარდაჭერა სავალუტო რეზერვების შევსების ხარჯზე, რაც ინვესტორფთა ნდობის განმტკიცებას შეუწყობს ხელს.
პროგრამის მთლიანი მოცულობა დაახლოებით 1 მლრდ დოლარს შეადგენს.
