„ქართული პარტიის" თავმჯდომარე სოზარ სუბარი საერთაშორისო უფლებადამცველ ორგანიზაციებსა და საქართველოში აკრედიტებულ დიპლომტიურ მისიებს საგანგებო მიმართვას უგზავნის. სუბარი მათ რეაგირებისკენ მოუწოდებს რამდენიმე დღის წინ მომხდარ ფაქტზე როდესაც საპატრულო პოლიციამ, ძალის გამოყენებით, დაშალა ომის ვეტერანების, 1992-1993 წლებისა და 2008 წლის საომარი მოქმედებების მონაწილეების საპროტეტო აქცია.
სოზარ სუბარმა ამ მიმართვის შინაარსი ჟურნალისტებს გააცნო პარტიის ოფისში გამართულ პრესკონფერენციაზე, რომელსაც აქციის დროს დაკავებული „ქართული პარტიის" ისნის რაიომული ორგანიზაციის ხელმძღვანელი ეკა მათიაშვილი და „ქართული პარტიის" ახალგაზრდული ორგანიზაციის ერთ-ერთი ლიდერი შოთა იამანიძე ესწრებოდნენ.
სოზარ სუბარის განცხადებით, აღნიშნული აქცია მიმდინარეობდა ,,შეკრებებისა და მანიფესტაციების შესახებ" საქართველოს კანონის სრული დაცვით და აქციის მონაწილეებს დაკავებული არ ჰქონიათ გზის სავალი ნაწილი, არ გადაუკეტავთ მოძრაობა და არ დაურღვევიათ შეკრება-მანიფესტაციის ჩატარებისათვის საქართველოს კანონმდებლობით დადგენილი მოთხოვნები. ამასთან პირები, რომლებიც ფიზიკურად უსწორდებოდნენ და რიგ შემთხვევაში აკავებდნენ შეკრების მონაწილეებს, ატარებდნენ სამოქალაქო ფორმას, რაც მათ იდენტიფიცირებას შეუძლებელს ხდიდა.
„ვეტერანების აქცია თითქმის ერთი კვირის მანძილზე ყოველგვარი ექსცესების გარეშე მიმდინარეობდა და პოლიცია გამოჩნდა მხოლოდ მას მერე, რაც აქციის მახლობლად ჩაიარა საქართველოს პრეზიდენტის ესკორტმა. აქციის დაშლა ამ ამბიდან ზუსტად ორმოცი წუთის მერე დაიწყო, რაც გვაძლევს საფუძველს ვიფიქროთ, რომ ეს უკანონო გადაწყვეტილება პირადად მიხეილ სააკაშვილის ინიციატივით იქნა მიღებული", - აცხადებს სოზარ სუბარი.
„ქართული პარტიის" თავმჯდომარე აღნიშნავს, რომ მოსამართლე მხოლოდ პოლიციელთა ჩვენებებს დაეყრდნო და უარი თქვა ვიდეომასალის გაცნობაზე, სადაც ცალსახად ჩანს, რომ დაკავებულების მხრიდან ადგილი არ ჰქონია რაიმე მართლსაწინააღმდეგო ქმედებას.
მისივე თქმით, ხელისუფლების, ძალოვანი სტრუქტურების მხრიდან უფლებამოსილებათა გადამეტების ფაქტებს საქართველოში სისტემური ხასიათი აქვს და მყარ ტენდენციადაა ჩამოყალიბებული.
სოზარ სუბარი მიიჩნევს, რომ არსებულ სიტუაციაში საერთაშორისო თანამეგობრობის რეაქცია ასეთ ფაქტებზე არის თუ ერთადერთი არა, ერთ-ერთი ქმედითი ფაქტორი, რასაც საქართველოს ხელისუფლება მეტ-ნაკლებად მაინც რაღაც ანგარიშს უწევს.
„ამის დასტურია თუნდაც ის, რომ როდესაც ამერკის შეერთებული შტატების ელჩმა, ჯონ ბასმა ცალსახად დაგმო ვეტერანების დარბევის ფაქტი, საქართელოს შინაგან საქმეთა სამინისტრომ სპეციალური განცხადება გაავრცელა, რომ აქციის დარბევის მონაწილე ერთ-ერთი პოლიციელი ძალის გადამეტების გამო გათავისუფლებულია სამსახურიდან", - აღნიშნა პრესკონფერენციაზე „ქართული პარტიის" თავმჯდომარემ.
სოზარ სუბარის თქმით, ერთი პოლიციელის სამსახურიდან დათხოვნა არ არის მომხდარ ფაქტზე ადეკვატური რეაგირება და ყველა დამნაშავე კანონის მოთხოვნის შესაბამისად უნდა დაისაჯოს. თუმცა. იგი დარწმუნებული არ არის, რომ სამართლიანობა იზეიმებს, რადგან „ქართული პარტიის" მოთხოვნას, რომ დაწყებულიყო გამოძიება, შედეგი არ მოჰყოლია.
სოზარ სუბარი თხოვს საერთაშორისო უფლებადამცველ ორგანიზაციებსა და საქართველოში აკრედიტებულ დიპლომტიურ მისიებს, თავიანთი უფლემოსილების ფარგლებში, ყურადღება მიაქციონ და გამოეხმაურონ 3 იანვარს მომხდარ აღმაშფოთებელ ფაქტს.