საქართველოს საგარეო საქმეთა მინისტრის გრიგოლ ვაშაძის განცხადებით, რუსეთი არცერეთი ნაკისრი ვალდებულების შესრულებას რომ არ აპირებს, ყველასთვის კარგადაა ცნობილი.
"ის, რომ რუსეთი არცერთი ვალდებულების შესრულებას არ აპირებს, მათ შორის არც ადამიანის უფლებების ქარტიისა, ყველამ კარგად იცის. ე.წ. რუსულ-აფხაზური კომისიის მიერ ეთნიკურ ქართველებთან დაკავშირებით მიღებული გადაწყვეტილება (მათი ქონებრივი პრეტენზიების განხილვაზე უარი თქმა) ეთნოფაშიზმის გამოხატულებაა", - განაცხადა ვაშაძემ ჟურნალისტებთან საუბრისას აღნიშნულ საკითხზე კომენტირებისას.
მისივე შეფასებით, აღნიშნული კომისია წარმოადგენს სინამდვილეში ორი დამნაშავეობრივი კლანისგან შემდგარ ბანდას, რომელიც ნადავლს იყოფს.
ამასთან საგარეო საქმეთა მინისტრის თქმით რა ვირტუალური რეალობა და კრიმინალური დაჯგუფებებიც არ უნდა შეიქმნას საქართველოს დეოკუპაცია გარდაუვალია.
"აფხაზეთისა და ე.წ. სამხრეთ ოსეთის საქართველოს ერთიან სივრცეში დაბრუნებას ხელს ვერაფერი შეუშლის", - განმარტა ვაშაძემ.
შეგახსენებთ, რომ რუსულ-აფხაზურმა კომისიამ უარი განაცხადა ეთნიკური ქართველების ქონებრივი პრეტენზიების განხილვაზე. მათ შორის იმ ქართველებისაც, რომლებიც ამჟამად რუსეთის მოქალაქეები არიან.
