ვიცე პრემიერ-მინისტრი გიორგი ბარამიძე ოფიციალური ვიზიტით ლიტვაში იმყოფება. როგორც "ჯი-ეიჩ-ენს" ვიცე პრემიერ-მინისტრის პრესსამსახურში განუცხადეს, გიორგი ბარამიძემ ორმხრივი შეხვედრა გამართა ლიტვის რესპუბლიკის პარლამენტის (სეიმის) ვიცე-სპიკერთან, ევროპის საკითხთა კომიტეტის თამვჯდომარესთან, ბატონ ჩესლოვას სტანკევიჩუსთან.
გიორგი ბარამიძემ განსაკუთრებული მადლობა გადაუხადა ლიტვის პარლამენტის მიერ გასული წლის ზაფხულში საქართველოს შესახებ სპეციალური რეზოლუციის მიღების გამო, სადაც დაგმობილია რუსეთის აგრესია და საქართველოს ტერიტორიის 20% -ის ოკუპაციის ფაქტი.
აგრეთვე, აღნიშნულია საქართველოს სუვერენიტეტისა და ტერიტორიული მთლიანობის მხარდაჭერა საერთაშორისო საზოგადოების მიერ აღიარებულ საზღვრებში.
ვიცე პრემიერ-მინისტრმა ყურადღება გაამახვილა ლიტვის რესპუბლიკის მხარდაჭერაზე საქართველოს ევროპულ და ევრო-ატლანტიკურ სტრუქტურებში ინტეგრაციის გზაზე და ამ მხრივ ლიტვა-საქართველოს შორის ორმხრივი თანამშრომლობის შესახებ გაფორმებული ხელშეკრულების აქტიურად გამოყენების მნიშვნელობაზე.
შეხვედრაზე გიორგი ბარამიძემ დეტალურად ისაუბრა საქართველოს ოკუპირებულ ტერიტორიებზე ადამიანის უფლებათა დარღვევის არსებულ უმძიმეს მდგომარეობაზე და საქართველოს პრეზიდენტის სამშვიდობო ინიციატივის საფუძველზე რუსეთ-საქართველოს კონფლიქტის მშვიდობიანი გზით მოგვარების საჭიროებაზე.
ვიცე პრემიერ-მინისტრმა, ასევე ისაუბრა საქართველოში წარმატებით მიმდინარე დემოკრატიულ, საბაზრო ეკომონიკის განვითარებისა და ანტიკორუფციულ რეფორმებზე, საქართველოს მნიშვნელოვან სატრანზიტო როლზე ევროპის ენერგო-უსაფრთხოებაში და საქართველოში არსებულ ლიბერალურ საინვესტიციო-ბიზნეს გარემოზე.
საუბრის ბოლოს, გიორგი ბარამიძემ კიდევ ერთხელ ყურადღება გაამახვილა საერთაშორისო საზოგადოების მიერ რუსეთ-საქართველოს შორის მიმდინარე კონფლიქტის, კერძოდ, ოკუპაციისა და ეთნიკური წმენდის ფაქტის გაცნობიერების ობიექტური რეალობის აუცილებლობაზე.
აგრეთვე, ლიტვის რესპუბლიკის პარლამენტის ვიცე-სპიკერთან საუბრისას გიორგი ბარამიძემ განსაკუთრებული ყურადღება დაუთმო საქართველოში ინვესტიციების მოზიდვის მიზნით ევროკავშირთან თავისუფალი ვაჭრობის შესახებ მეტად მნიშვნელოვანი მოლაპარაკების დაწყებისა და ამ კუთხით ლიტვის მიერ აქტიური დახმარების მნიშვნელობას.