ვიცე პრემიერ-მინისტრი გიორგი ბარამიძე ოფიციალური ვიზიტით ლიტვის რესპუბლიკაში იმყოფება. როგორც ვიცე პრემიერ-მინისტრის პრესსამსახურში "ჯი-ეიჩ-ენს" განუცხადეს, ბარამიძემ შეხვედრა გამართა ლიტვის რესპუბლიკის თავდაცვის მინისტრთან, ქ-ნ რასა იუნკევიჩიენესთან.
გიორგი ბარამიძემ მადლობა გადაუხადა მინისტრს საქართველოს სუვერენიტეტის, ტერიტორიული მთლიანობისა და დეოკუპაციის საკითხებში აქტიური მხარდაჭერისათვის.
ვიცე პრემიერ-მინისტრმა ყურადღება გაამახვილა ლიტვის, როგორც საქართველოში ნატო-ს საკონტაქტო ქვეყნის როლზე, ისაუბრა ლიტვის, როგორც ეუთოს მოქმედი თამჯდომარე ქვეყნის როლის გაძლიერების აუცილებლობაზე საქართველო-რუსეთის კონფლიქტის მშვიდობიანი დარეგულირების პროცესში და საქართველოს პრეზიდენტის სამშვიდობო ინიციატივის მნიშვნელობაზე.
გიორგი ბარამიძემ ყურადღება ისაუბრა, ასევე, ოკუპირებულ ტერიტორიებზე ადამიანის უფლებების უხეშ დარღვევებზე და აღნიშნა, რომ აუცილებელია ეუთოს, ევროკავშირისა და სხვა საერთაშორისო ორგანიზაციების გააქტიურება ოკუპირებული ტერიტორიების მონიტორინგისა და იძულებით დევნილი მოსახლეობის საკუთარ სახლებში უსაფრთხოდ და ღირსეულად დაბრუნების პროცესში.
შეხვედრის დროს აღინიშნა ორ ქვეყანას შორის სამხედრო-პოლიტიკურ სფეროში ურთიერთობების გაღრმავების აუცილებლობა.
ლიტვის თავდაცვის მინისტრმა ხაზი გაუსვა იმას, რომ ლიტვა მზად არის მომავალშიც კვლავაც გააგრძელოს ქართული არმიის განათლების, პროფესიონალური განვითარებისა და თავდაცვის სფეროში მიმდინარე რეფორმების, ისევე როგორც ნატო-ში გაწევრიანებისკენ მიმართული ყველა ძალისხმევის მხარდაჭერა. ასევე, იგი მიესალმა საქართველოს მზადყოფნას, გააგრძელოს აქტიური მონაწილეობა ავღანეთში ნატო-ს საერთაშორისო უსაფრთხოების უზრუნველყოფის ოპერაციაში და ამით თავისი წვლილი შეიტანოს ევრო-ატლანტიკური თანამეგობრობის საერთო პრობლემების მოგვარებაში, რაც უფრო მეტად წაადგება საქართველოს ნატო-ში გაწევრიანების პროცესში.