2011 წელს აჭარა ახალი სამიზნე ბაზრების ათვისებას იწყებს.
აჭარის ტურიზმის დეპარტამენტის ახლად დანიშნული თავმჯდომარე ბაჩუკი ჩხეიძე აცხადებს, რომ 2011 წელს რეგიონი ახალ სამიზნე ბაზრებზე დაიწყებს ინტენსიურ მუშაობას. კერძოდ, კი ირანისა და ბელორუსის ქვეყნებისთვის სპეციალური სარეკლამო და მარკეტინგული კამპანია შემუშავდება.
"გვაქვს ახალი პრიორიტეტული ქვეყები, საიდანაც მეტი ტურისტი უნდა მოვიზოდოთ. ეს ახალი სამიზნე ქვეყნებია ბელორუსია და ირანი. ამ ქვეყნებისთვის სპეციალური გეგმა შემუშავდება",- აცხადებს აჭარის ტურიზმის დეპარტამენტის თავმჯდომარე ბაჩუკი ჩხეიძე.
2010 წელს აჭარაში ჩამოსულ უცხოელ ტურისტთა შორის ირანელი ტურისტების რაოდენობამ მკვეთრად იმატა.
2010 წელს, 2009 წელთან შედარებით, აჭარაში ირანელი ვიზიტორების რაოდენობა 1855,2 %-ით გაიზარდა, ხოლო 2008 წელთან შედარებით 1274,6 %-ით.
იმავდროულად 2010 წლის 4 ნოემბერს ბათუმში, დუმბაძის ქ. #16-ში ირანის ისლამური რესპუბლიკის გენერალური საკონსულო უკვე გაიხსნა.
ბაჩუკი ჩხეიძე აჭარის ტურიზმის დეპარტამენტის თავმჯდომარედ 12 იანვარს დაინიშნა. ის ამბობს, რომ ტურიზმის მიმართულებით გარკვეული გამოცდილება გააჩნია.
"ზოგადად ტურიზმის სფეროს ვიცნობდი და წინა სამსახურებიდან ამ სფეროსთან ირიბად შეხება მაინც მქონდა. ტურიზმის განვითარება ჩვენი რეგიონის და ასევე მთლიანად ქვეყნის ერთ-ერთი უმნიშვნელოვანესი პრიორიტეტია. ზღვის კურორტები საქართველოში განვითარებული იყო. მას რეაბილიტირება და თანამედროვე სტანდარტებზე მოყვანა სჭირდებოდა, რაც კარგი ტემპით მიმდინარეობს. მნიშვნელოვანია ასევე აჭარაში სამთო ტურიზმის განვითაებაც. სამთო-სათხილამურო კურორტების განვითარება ჩვენი უახლოესი პერიოდის მთავარი მიმართულებაა",- აცხადებს ბაჩუკი ჩხეიძე.
