სახელგანთქმული კინოვარსკვლავი, ფრანგული კინოს ლეგენდა, ალენ დელონი 88 წლის ასაკში გარდაიცვალა. იტყობინება Le Monde.
მსახიობის გარდაცვალების შესახებ ინფორმაცია მისმა შვილებმა გაავრცელეს.
ოჯახის განცხადებით, მსახიობი საკუთარ სახლში, ოჯახის წევრების გარემოცვაში გარდაიცვალა.
"ალენ ფაბიენი, ანუშკა, ენტონი, ისევე, როგორც ლუბო (მსახიობის ძაღლი) მწუხარებით გატყობინებთ მამის გარდაცვალების ამბავს. მან სიმშვიდეში, საკუთარ სახლში, ოჯახის წევრების გარემოცვაში დატოვა ეს სამყარო", - წერია ოჯახის განცხადებაში.
ალენ დელონს არაერთ ფილმში აქვს მონაწილეობა მიღებული. განსაკუთრებული პოპულარობა მოუტანა შესრულებულმა როლებმა ფილმებში - "როკო და მისი ძმები", "ლეოპარდი", "შავი ტიტა", "სამურაი", "ორნი ქალაქში" და სხვ.
მიღებული აქვს ფრანგული კინოს პრემია "სეზარი" მამაკაცის როლის საუკეთესო შესრულებისთვის ფილმში "ჩვენი ისტორია". კინემატოგრაფიის განვითარებაში შეტანილი წვლილისთვის გადაეცა ბერლინისა და კანის საერთაშორისო ფესტივალების საპატიო ჯილდოები.
