აფხაზეთისა და სამაჩაბლოს ომის ვეტერანები მორიგი საპროტესტო აქციისთვის ემზადებიან. ამის შესახებ "ჯი-ეიჩ-ენს" აფხაზეთისა და სამაჩაბლოს ომის ვეტერანმა თეიმურაზ ელისაშვილმა აცნობა.
მისი თქმით, ხელისუფლებამ ვეტერანების დარბევით საკუთარ თავს ხარაკირი გაუკეთა.
თეიმურაზ ელისაშვილის თქმით, ის ვეტერანები, რომელთაც 400 ლარიანი ჯარიმა შეუფარდეს, ამ თანხის გადახდას ვერ შეძლებენ. ამიტომ ვეტერანები ამ გადაწყვეტილებას გააპროტესტებენ. ელისაშვილი აცხადებს, რომ აქციის გამართვის შესახებ მერიაში განაცხადი მათ ადრე შეტანილი ჰქონდათ, თუმცა ხელისუფლებამ მათი დარბევა მაინც გადაწყვიტა.
თეიმურაზ ელისაშვილის თქმით, ხელისუფლებამ გმირთა მემორიალის მიმდებარე ტერიტორიის დასუფთავება არ ისურვა, რაც გამიზნულად მოხდა.
" ჩვენს დასარბევად ყველაფერი იღონეს. იმ ადგილების დაბინძურება აწყობდათ. ნუგზარ წიკლაურის განცხადება ანტისანიტარიასთან დაკავშირებით აბსურდი და ცილისწამება გახლდათ. სინამდვილეში, საპირფარეშოები მემორიალის უკან იყო. ნაცვლად იმისა, გაარკვიონ, ვინ გადაყარა ომებში დაღუპული ჩვენი თანამებრძოლების სურათები, პროკურატურა მხოლოდ იმას იძიებს, თუ ვინ მიიტანა სურათები მემორიალთან. ეს ცინიზმია,"_აცხადებს ელისაშვილი.
