საქართველოს პარლამენტში ბიზნესსაბჭო შეიქმნება.
ინიციატივა საკანონმდებლო ორგანოს სპიკერ დავით ბაქრაძეს ეკუთვნის, რომელიც მან ბიზნესასოციაციის წარმომადგენლებს დღეს გამართულ შეხვედრაზე გააცნო.
ინიციატივის თანახმად, ბიზნესსაბჭოში დეპუტატები და ბიზნესმენები იქნებიან წარმოდგენილნი.
როგორც ბაქრაძემ ჟურნალისტებს დახურული შეხვედრის დაწყებამდე განუცხადა, საბჭოს ფარგლებში ბიზნესმენებს საკანონმდებლო ორგანოში მათთვის საჭირბოროტო საკითხებზე წინადადებების წარდგენა შეეძლებათ.
"საბჭოს მიზანი სწორედ პრობლემების გადაჭრა იქნება. ბიზნესსაბჭო პრობლემურ საკითხებს მუდმივად განიხილავს", - განაცხადა ბაქრაძემ, რომელმაც აქვე ისიც განმარტა, რომ ბიზნესსაბჭოს მუშაობაში მონაწილეობას თავადაც მიიღებს.