აჭარაში გასულ წელს დაგეგმილზე 24%-ით ნაკლები ჩაის წარმოება მოხდა. აჭარის სოფლის მეურნეობის სამინისტროს ინფორმაციით, 2010 წელს ჩაის პლანტაციებში საგაზაფხულო გასხვლა-ფორმირებითი სამუშაოები პროგნოზით გათვალისწინებულ 520 ჰა-დან 328 ჰა-ზე ჩატარდა, სეზონზე რეგიონში დაგეგმილი იყო 800 ტონამდე ჩაის ფოთლის წარმოება, თუმცა საანგარიშო პერიოდში 645 ტონა ჩაის ფოთოლი გადამუშავდა. რეგიონის მაშტაბით, ჩაის გადამამუშავებას ახორციელებდა 5 საწარმო, კერძოდ: შპს "იაგო", შპს "ემირი", შპს "აჭარა ინვესტ ჩაი", შპს "აგროფირმა ქობულეთი" და შპს ,"აგროექსპორტი~.
შპს ,,იაგო"-ს მიერ 2010 წლის სეზონზე სულ ექსპორტირებულია 167 ტონა აგურა ჩაი, რომელთაგანაც 60 ტონა უკრაინის, ხოლო 107 ტონა ბელორუსიის მიმართულებითაა გადატვირთული.
2010 წლის განმავლობაში შპს "ემირის" მიერ ექსპორტირებულია 300 ტონამდე აგურა ჩაი, (მათ შორის 100 ტონა უკრაინაში, 60 ტ მინღოლეთსა და 40 ტ ბელორუსიის რესპუბლიკაში).
შპს "აჭარა ინვესტ ჩაის" მიერ მიმდინარე წლის მაისის თვეში, ხელვაჩაურის მუნიციპალიტეტის სოფელ მარადიდში, ამოქმედებული იქნა ჩაის გადამამუშავებელი მიკრო-ფაბრიკა, რომელშიც შავი ბაიხის ჩაი იწარმოება. 2010 წელს კომპანიამ 36 ტონა ნედლი ჩაის ფოთოლი გადაამუშავა და იმავდროულად 28 ჰა ჩაის პლანტაციის რეაბილიტაცია განახორციელა.
ჩაის ბაზრის კიდევ ერთი მოთამაშე, შპს ,,აგროფირმა ქობულეთი"- შპს ,,მილენიუმ ტრანსი"-ს მიერ წარმოებული ჩაის მიღება-გადამუშავებას, მწვანე და შავი ბაიხის ჩაის დამზადებას ახორციელებს. კომპანიის მიერ ქობულეთის მუნიციპალიტეტის სოფელ ხუცუბანში რეაბილიტირებულია 300 ჰა ჩაის პლანტაცია. 2010 წელს კომპანიის მიერ წარმოებულია 600 ტონა ჩაის ფოთოლი, რომელთაგანაც დამზადებულია 137 ტონა მზა პროდუქცია, კერძოდ 121 ტონა შავი ბაიხის და 16 ტონა მწვანე ბაიხის ჩაის პროდუქცია.
2010 წელს შპს ,,აგროექსპორტმა~ 2 სახის ბრენდი შექმნა: ქართული შავი ჩაი "ელიტა" და ქართული მწვანე ჩაი "ბათუმი~. კომპანიის მიერ გასულ წელს სულ დამზადებული იქნა ერთჯერადი მოხმარების 7 000 ცალი კოლოფი ქართული ჩაი.
აჭარის სოფლის მეურნეობის სამინისტროში აცხადებენ, რომ ადგილობრივ სამომხმარებლო ბაზრებზე იმპორტირებული ჩაის პროდუქციის გვერდით, ადგილი დაიმკვიდრა 4 სახის ადგილობრივი წარმოების ჩაის პროდუქციამ: "სამაია", "მარადიდი~, "ელიტა" და "ბათუმი~, რომელიც საკმაოდ კონკურენტუნარიანი და პერსპექტიულია, რაც იძლევა იმის საშუალებას, რომ სამომავლოდ მისი ექსპორტზე გატანა და ახალი სამომხმარებლო ბაზრების ათვისება დაიგეგმოს.