აჭარის სოფლის მეურნეობის მინისტრის ემზარ ძირკვაძის ინფორმაციით, 2010 წლის განმავლობაში აჭარაში ხორბლის გადამუშავებას 6 წისქვილ-კომბინატი (შპს,,იმპერილი-2000", შპს,,ორცვა", შპს,,ურეხი", შპს,,ნაშ-3", შპს ,,მიმოზა~ შპს,,ბარაქა-2005") აწარმოებდა.
მინისტრი აცხადებს, რომ 2010 წლის მესამე დეკადაში მსოფლიო ბაზარზე ხორბლის ღირებულება მკვეთრად გაიზარდა, რისი მიზეზიც მსოფლიოში მცირე მოსავლიანობა გახდა, რაც თავის მხრივ ხშირი გვალვებითა და უამინდობით იყო განპირობებული.
2010 წლის აგვისტოს დასაწყისში 1 ტომარა (50კგ) უმაღლესი ხარისხის ფქვილის ფასი 38 ლარის ფარგლებში მერყეობდა, თვის ბოლოს კი ღირებულება 29 %-ით გაიზარდა და 49 ლარი შეადგინა. 15 დეკემბრის მდგომარეობით 1 ტომარა (50კგ) უმაღლესი ხარისხის ფქვილის ფასი 47,5-49,5 ლარის ფარგლებში მერყეობდა.

რუსეთის მიერ ხორბლის ექსპორტზე დროებითი შეზღუდვის დაწესების შემდგომ, საქართველოსათვის ხორბლის ძირითადი მომწოდებლები უკრაინისა და ყაზახეთის რესპუბლიკები გახდნენ, რეგიონის წისქვილკომბინატები სისტემატიურ მოლაპარაკებებს აწარმოებდნენ უკრაინელ და ყაზახურ კომპანიებთან ხორბლის შეუფერხებელ მოწოდებაზე, რათა დაცული ყოფილიყო მოსახლეობის სასურსათო უსაფრთხოება. საანგარიშო პერიოდში ყველა წისქვილკომბინატს, რეგიონის მოსახლეობისათვის საჭირო რაოდენობის (თვეში 3 000 ტონამდე) ხორბლის ფქვილის ორი თვის მარაგი გააჩნია, რის შედეგადაც პურის ფქვილის დეფიციტის საშიშროება არ დამდგარა.