აჭარაში სურსათის უვნებლობის სამსახურის მიერ ჩატარებული შემოწმებებიდან 84 ობიექტში ვადაგასული პროდუქტებით რეალიზაციის ფაქტები დაფიქსირდა.
აჭარის სოფლის მეურნეობის მინისტრის ემზარ ძირკვაძის განმარტებით, 2010 წელს აჭარაში სურსათის უვნებლობისა და ხარისხის ზედამხედველობის მიზნით, მონიტორინგი ჩატარდა 553 ობიექტში, მათ შორის: 216 - სურსათის სარეალიზაციო ობიექტში, 278 - საზოგადოებრივი კვების ობიექტში, 3 - აგრარულ ბაზარში.
ძირკვაძის განმარტებით, ჩატარებული მონიტორინგის შედეგად 84 ობიექტში ვადაგასული პროდუქტებით რეალიზაციის ფაქტები დაფიქსირდა.
"გამოვლენილი დარღვევების აღმოფხვრისა და ვადაგასული პროდუქტების რეალიზაციის შეჩერების მიზნით მიწერილობა გაეგზავნა 156 ობიექტის ხელმძღვანელს, ხოლო 919 სამახსოვრო ბუკლეტი დარიგდა სურსათის სარეალიზაციო და საზოგადოებრივი კვების ობიექტში.
მონიტორინგის მიმდინარეობისას სურსათის სარეალიზაციო ობიექტებში გამოვლენილი იქნა ვადაგასული პროდუქტები კერძოდ: ხორცი და ხორცპროდუქტები - 50 კგ; მარცვალი (თესლი) საფქვავ-საბურღულე და პურფუნთუშეული - 8 კგ; ცხიმოვანი პროდუქტები მაიონეზი - 24 კგ, რძე და რძის პროდუქტები - 34 კგ, თევზი და მათი გადამუშავების პროდუქტები - 4 კგ; შაქარი და საკონდიტრო ნაწარმი - 38 კგ; უალკოჰოლო გამაგრილებელი სასმელები - 48.5 ლიტრი; სხვა პროდუქტები - 1.5 კგ; ხილბოსტნეულის პროდუქცია - 4 კგ."- აცხადებს აჭარის სოფლის მეურნეობის მინისტრი ემზარ ძირკვაძე.
მინისტრი აცხადებს, რომ აღნიშნული პროდუქტები განადგურებული იქნა მეწარმეების მიერ სამსახურის უფლებამოსილი მოხელის თანდასწრებით.
2010 წლის განმავლობაში აჭარის სურსათის უვნებლობის სამსახურის მიერ შესყიდული იქნა სასურსათო პროდუქციის 250 საანალიზო ნიმუში, აქედან: ბათუმი - 217 ნიმუში, ქობულეთის მუნიციპალიტეტი - 27 ნიმუში, ხელვაჩაურის მუნიციპალიტეტი - 6 ნიმუში.
ნიმუშები შესაბამისი გამოკვლევისათვის აკრედიტებულ ლაბორატორიაში გადაიგზავნა.