"ასტრა პარკის" ახალი მფლობელი "საქართველოს ბანკი" გახდა. აღსრულების ეროვნული ბიუროს ინფორმაციით, "საქართველოს ბანკმა" "ასტრა პარკი" განმეორებით აუქციონზე 1 მლნ. 300 ათას ლარად იყიდა. ბიუროში განმარტავენ, რომ "ასტრა პარკის" მენეჯმენტს "საქართველოს ბაკის" კრედიტორული დავალიანებაც გააჩნდა.
აუქციონზე, ობიექტი გასასხვისებლად აღსრულების ეროვნული ბიუროს თბილისის სააღსრულებო ბიუროს აღმასრულებელმა დავით კულდანაშვილმა გამოიტანა. ობიექტის საწყისი ფასი 1 მლნ. 158 ათას 500 ლარით იყო განსაზღვრული.
შეგახსენებთ, რომ გასართობი ცენტრი „ასტრა პარკი" 2007 წლის ოქტომბრიდან ფუნქციონირებს.
პარკის ერთ-ერთ მთავარ ღირსშესანიშნაობას წარმოადგენს კარტინგ-ცენტრი, რომელიც 2000 კვადრატულ მეტრზეა განთავსებული. სარბოლო ტრასა, რომელიც 320 მეტრს მოიცავს, თანამედროვე საფარითაა დაფარული, რაც უფრო კომფორტულსა და აზარტულს ხდის რბოლას.
სარბოლო მანქანები ფრანგული ფირმა „სოდიკარტის" წარმოებისაა, რომელიც ჰონდას 200 სმ3 ძრავითაა აღჭურვილი. ცენტრში შესაძლებელია როგორც მოზრდილთა, ასევე ასაკით შედარებით მცირეწლოვან მრბოლელთა მიღება. ტრასაზე ერთდროულად შესაძლებელია რვა მანქანის რბოლა და თითეოულის მაქსიმალური სიჩქარეა 70 კმ/სთ. მრბოლელთა უსაფრთხოება მაქსიმალურად დაცულია. მრბოლელები აღჭურვილნი არიან ჩაფხუტებითა და კისრის დამცავი სპეციალური კორსეტებით.