ევრო 2024-ის ჯგუფური ეტაპი დასრულებულია და ტურნირის დებიუტანტი მერვედფინალშია! მეტიც, ჯგუფური ეტაპის საუკეთესო ბომბარდირი გიორგი მიქაუტაძეა 3 გოლით. გიორგიმ საქართველოს ნაკრების ოთხივე გოლში მიიღო უშუალო მონაწილეობა (3 გოლი, 1 საგოლე პასი).
ისტორიული წარმატების, კონტინენტის პირველობის მერვედფინალში გასვლის შემდეგ მიქაუტაძემ ამ გამარჯვების მნიშვნელობაზე ისაუბრა.
„საქართველომ გაიმარჯვა და ევროპის ჩემპიონატის მერვედფინალში გავედით. არ ვიცი, გულშემატკივარს მადლობა როგორ ვუთხრა, ისინი მუდამ ჩვენ უკან არიან, ჩვენ კი ყველაფერს ვაკეთებთ, რომ ისინი გავახაროთ.
გაჩერებას არ ვაპირებთ, ევროპის ჩემპიონატი ახლა დაიწყო. ვიცით, რომ ჩვენი მომდევნო მეტოქე ესპანეთი იქნება და ყველაფერი უნდა გავაკეთოთ, რომ შემდეგ ეტაპზე გავიდეთ“, – განაცხადა გიორგი მიქაუტაძე.
მერვედფინალში საქართველოსა და ესპანეთის ნაკრებების შეხვედრა 30 ივნისს კიოლნში ჩატარდება.
პირველი არხი
