სისხლის სამართლის საერთაშორისო პოლიციამ (ინტერპოლმა) ყირგიზეთის ექს-პრეზიდენტ ყურმან ბაკიევის, მისი ვაჟების _ ჟანიშასა და მარატის მოძიების საქმეში ყირგიზეთის ხელისუფლებასთან თანამშრომლობაზე უარი განაცხადა.
ინტერპოლის უარი ვრცელდება ყოფილ პრემიერ-მინისტრ დანიარ უსენოვისა და ყირგიზეთის სპეცსამსახურების ექს-მეთაურის მურატ სუთალინოვის ძიებაზედაც. ამის შესახებ ინტერპოლის ოფიციალურ წერილშია ნათქვამი.
ინტერპოლის გზავნილში აღნიშნულია, რომ სისხლის სამართლის დანაშაულს მიხედვით (დანაშაულში თანამონაწილეობა, მკვლელობები და თანამდებობრივი უფლებამოსილების გადამეტება) ამ ადამიანებზე გამოცხადებული ძიება ინტერპოლის წესებსა და კონსტიტუციას ეწინააღმდეგება. კერძოდ, ორგანიზაცია სახელმწიფოს საშინაო საქმეებში ვერ ჩაერევა.
შეგახსენებთ, ბაკიევის რეჟიმი 2010 წლის 7 აპრილს ყირგიზეთში მომხდარი რვოლუციის შემდეგ დაამხეს. აპრილის მოვლენების გამო სასამართლო პროცესი 17 ნოემბერს დაიწყო. სისხლის სამართლის მასალა 60 ტომს მოიცავს. საერთაშორისო ძებნა ექვს კაცზეა გამოცხადებული.
